Dr. Indresh Kumar visited the house of MRM leader Badruddin Halani: احمدآباد طیارہ حادثے میں اپنی جان گنوانے والے ایم آر ایم لیڈر بدرالدین حالانی کے گھر پہنچے ڈاکٹر اندریش کمار، اہل خانہ سے کی تعزیت، کہا-ان کی خدمات ہمیشہ یاد رکھی جائیں گی

احمد آباد میں ایئر انڈیا کے جان لیوا طیارہ حادثے میں جو 241 افراد اپنی جان سے ہاتھ دھو بیٹھے، ان میں سے مسلم راشٹریہ منچ کے قومی خزانچی بدرالدین حالانی، ان کی اہلیہ اور ان کی بھابھی بھی شامل تھیں۔ مسلم راشٹریہ منچ نے ان کے انتقال پر گہری تعزیت کا اظہار کرتے ہوئے کہا تھا کہ ان کے جانے سے ایک خلا پیدا ہو گیا ہے۔

دریں اثنا آج آر ایس ایس کے معروف ومقبول لیڈر اور پرچارک ڈاکٹر اندریش کمار بھی گجرات کے آنند میں واقع بدرالدین حالانی کے گھر پہنچے اور ان کے اہل خانہ سے ملاقات کی۔ ڈاکٹر اندریش کمار نے بدرالدین حالانی کے بیٹے، بیٹی، بھائی اور دیگر اہل خانہ سے تعزیت کی اور اس مشکل وقت میں صبر و حوصلے کی تلقین کی۔ انھوں نے مرحوم کو یاد کرتے ہوئے کہا کہ ’’حالانی صاحب نہایت خوش مزاج اور نیک دل انسان تھے۔ ان کی خدمات ہمیشہ یاد رکھی جائیں گی۔‘‘

حالانی صاحب کی کوششوں سے ہی آنند میں کھلا آر ایس ایس کا دفتر: ڈاکٹر اندریش کمار

ڈاکٹر اندریش کمار نے مزید بتایا کہ وہ تین سال قبل بھی حالانی صاحب سے ملنے ان کے گھر آئے تھے اور اس وقت حالانی صاحب نے کہا تھا کہ آنند شہر میں آر ایس ایس کا کوئی دفتر نہیں ہے۔ پھر حالانی صاحب کی کوششوں سے ہی وہاں آر ایس ایس کا دفتر قائم ہوا۔ ڈاکٹر اندریش کمار نے بتایا کہ ’’اس دفتر کی آخری قسط بچی ہوئی تھی، جو کہ بدرالدین حالانی کے بھائی راجو حالانی نے میرے ذریعے عزت مآب سنگھ چالک کو ادا کر دی ہے۔‘‘

ڈاکٹر اندریش کمار نے مزید بتایا کہ مرحوم حالانی ایک فوجی اسکول کھولنے کے بھی خواہاں تھے تاکہ نئی نسل کو ملک کی خدمت کے لیے تیار کیا جا سکے۔ ان کے اہل خانہ نے اس مشن کو جلد مکمل کرنے کا عزم ظاہر کیا ہے۔ اس موقع پر مقامی رکنِ پارلیمان اور ارکانِ اسمبلی ڈاکٹر شاہد اختر، ظہیر قریشی، سلیم پٹھان اور آر ایس ایس کے دیگر عہدیداران بھی موجود تھے، جنھوں نے مرحوم کو خراج عقیدت پیش کیا۔

بھارت ایکسپریس اردو