Do Not Book LPG in Panic: گھبراہٹ میں بک نہ کریں ایل پی جی، 7 دن میں پی این جی کنکشن فراہم کرانے کی یقین دہانی، ایندھن بحران پر حکومت کا اہم بیان

نئی دہلی: ملک میں ایندھن کی قلت کی خبروں کے درمیان حکومت نے عوام سے اپیل کی ہے کہ وہ گھبراہٹ میں ایل پی جی (رسوئی گیس) کی بکنگ نہ کریں، جبکہ پی این جی (پائپڈ نیچرل گیس) کنکشن 7 دن کے اندر فراہم کرنے کی یقین دہانی کرائی گئی ہے۔ اس کے ساتھ ہی گیس بل کے نام پر ہونے والی سائبر دھوکہ دہی سے بچنے کے لیے بھی انتباہ جاری کیا گیا ہے۔

سائبر دھوکہ دہی پر سخت وارننگ

اطلاعات و نشریات کی وزارت کے افسرسی سینتھل راجن نے خبردار کیا ہے کہ لوگوں کے موبائل فون پر گیس بل کے نام سے APK فائلز بھیجی جا رہی ہیں۔ ان میں صارفین سے بینک کی تفصیلات مانگی جاتی ہیں اور معلومات درج کرتے ہی بینک اکاؤنٹ خالی ہو جاتا ہے۔ انہوں نے کہا کہ ایسے کسی بھی مشتبہ پیغام سے ہوشیار رہیں اور فوری طور پر پولیس میں شکایت درج کرائیں۔

تیل کی سپلائی پر حکومت کی یقین دہانی

پٹرولیم وزارت کی جوائنٹ سکریٹری سجاتا شرما نے واضح کیا کہ ملک میں کہیں بھی پٹرول پمپوں پر تیل ختم نہیں ہونے دیا جائے گا۔ انہوں نے کہا کہ حکومت مسلسل کوشش کر رہی ہے کہ ایندھن کی سپلائی میں کسی قسم کی رکاوٹ پیدا نہ ہو۔ اس سلسلے میں وزارت جہاز رانی کے خصوصی سکریٹری راجیش کے سنہا اور وزارت خارجہ کے ترجمان رندھیر جیسوال بھی صورتحال پر قریبی نظر رکھے ہوئے ہیں۔

پی این جی کے فروغ پر زور

حکومت اب ایل پی جی کے استعمال کو کم کر کے پی این جی کو فروغ دینے پر زور دے رہی ہے۔ وزارت خارجہ کے افسر عاصم مہاجن نے بتایا کہ کمرشیل صارفین سے اپیل کی جا رہی ہے کہ وہ جلد از جلد پی این جی پر منتقل ہو جائیں۔ انہوں نے کہا کہ گزشتہ ایک ہفتے میں 1.25 لاکھ نئے پی این جی کنکشن دیے جا چکے ہیں اور ہدایت دی گئی ہے کہ ہر درخواست کو ایک ہفتے کے اندر منظور کیا جائے۔

بیرونِ ملک پھنسے بھارتیوں کی واپسی

حکومت نے بیرون ملک پھنسے بھارتیوں کی واپسی کا عمل بھی تیز کر دیا ہے۔ عاصم آر مہاجن کے مطابق 28 فروری سے اب تک تقریباً 28 لاکھ افراد بحفاظت بھارت واپس آ چکے ہیں۔ کویت میں فضائی راستہ بند ہونے کے باعث مشکلات پیدا ہوئی تھیں، تاہم اب جزیرہ ایئرویز سعودی عرب کے راستے خصوصی پروازیں چلا رہی ہے۔ کل کوچی کے لیے پہلی خصوصی پرواز روانہ ہوگی، جس سے خاص طور پر کیرالہ کے لوگوں کو راحت ملے گی۔ حکومت نے عوام سے اپیل کی ہے کہ وہ افواہوں پر دھیان نہ دیں، غیر معروف لنکس پر کلک نہ کریں اور گھبراہٹ میں فیصلے لینے سے گریز کریں۔ حکام کے مطابق اس مشکل وقت میں دانشمندی اور احتیاط ہی سب سے بڑی ضرورت ہے تاکہ نہ صرف ایندھن کی فراہمی جاری رہے بلکہ عوام سائبر جرائم سے بھی محفوظ رہ سکیں۔

بھارت ایکسپریس اردو۔