Republic Day 2026: یوم جمہوریہ پر وزیراعظم مودی کا پیغام: جمہوریت، آئین اور ترقی یافتہ بھارت کے عزم کو قوم کی اصل طاقت دیا قرار

ملک آج 77واں یوم جمہوریہ پورے جوش، ولولے اور قومی فخر کے ساتھ منا رہا ہے۔ اس قومی موقع پر وزیراعظم نریندر مودی نے ملک کے عوام کو مبارکباد پیش کی اور جمہوریت، آئین اور قومی تعمیر کے اجتماعی عزم کو بھارت کی سب سے بڑی طاقت قرار دیا۔ وزیرِاعظم نے سوشل میڈیا پلیٹ فارم ایکس پر یکے بعد دیگرے کئی پیغامات شیئر کرتے ہوئے یومِ جمہوریہ کی اہمیت کو اجاگر کیا۔یوم جمہوریہ کے موقع پر وزیرِاعظم مودی نے اپنے پیغام میں کہا کہ یہ دن بھارت کی آزادی، آئین اور جمہوری اقدار کی مضبوط علامت ہے۔ انہوں نے لکھا کہ یومِ جمہوریہ ہمیں متحد ہو کر قوم کی تعمیر کے عزم کے ساتھ آگے بڑھنے کی نئی توانائی اور تحریک دیتا ہے۔ وزیرِاعظم نے اس بات پر زور دیا کہ یہی جمہوری اقدار بھارت کو مضبوط اور بااختیار بناتی ہیں۔

ایک اور پیغام میں وزیرِاعظم مودی نے کہا کہ یہ موقع ترقی یافتہ بھارت کے ہمارے اجتماعی عزم میں نئی جان اور جوش بھرنے کا باعث بنتا ہے۔ انہوں نے ملک کے عوام سے اپیل کی کہ وہ متحد ہو کر ملک کو ترقی یافتہ بنانے کے ہدف کی جانب قدم بڑھائیں اور اپنی ذمہ داریوں کو پوری ایمانداری سے نبھائیں۔وزیرِاعظم نریندر مودی نے صدرِ جمہوریہ دروپدی مرمو کے یومِ جمہوریہ کی پیشگی شب پر قوم سے خطاب کو بھی سراہا۔ انہوں نے صدر کے خطاب کو ری پوسٹ کرتے ہوئے کہا کہ صدرِ جمہوریہ کا یہ خطاب نہایت متاثر کن اور حوصلہ افزا ہے۔ وزیرِاعظم کے مطابق صدر نے اپنے خطاب میں آئین کی خصوصیات کو اجاگر کیا اور اس اجتماعی جذبے کی تعریف کی جس نے بھارت کو مسلسل ترقی کی راہ پر گامزن رکھا ہے۔

وزیرِاعظم نے مزید کہا کہ صدرِ جمہوریہ کا خطاب ہر شہری کو جمہوریت کو مضبوط بنانے، آئینی اقدار کے تحفظ اور ترقی یافتہ بھارت کی تعمیر کے لیے اپنی وابستگی کو مزید مستحکم کرنے کی ترغیب دیتا ہے۔واضح رہے کہ یومِ جمہوریہ ہر سال 26 جنوری کو منایا جاتا ہے۔ اسی دن 1950 میں بھارت کا آئین نافذ ہوا اور ملک ایک خود مختار جمہوریہ بنا۔ یہ دن نہ صرف جشن کا موقع ہے بلکہ آئین، جمہوریت اور شہری حقوق کی یاد دہانی بھی کراتا ہے۔ کرتویہ پاتھ پر منعقد ہونے والی پریڈ بھارت کی فوجی طاقت، ثقافتی تنوع اور قومی یکجہتی کی علامت سمجھی جاتی ہے۔

بھارت ایکسپریس اردو