All India Weather Update: دو روزہ موسلادھار بارش کے بعد دہلی-این سی آر میں موسم صاف،جھارکھنڈ سے بنگال تک مانسون کی تباہی کا الرٹ

نئی دہلی :ملک بھر میں مانسون نے شدید تباہی مچا رکھی ہے اور کئی ریاستوں میں موسلادھار بارش، تیز آندھی، آسمانی بجلی اور سیلاب جیسے حالات نے عوام کی مشکلات میں اضافہ کر دیا ہے۔ محکمہ موسمیات (آئی ایم ڈی) نے 11 جولائی 2026 کے لیے تازہ پیش گوئی جاری کرتے ہوئے خبردار کیا ہے کہ دہلی-این سی آر، اتر پردیش، بہار، جھارکھنڈ، مغربی بنگال، اتراکھنڈ، ہماچل پردیش سمیت تقریباً 20 ریاستوں میں شدید بارش اور تیز ہواؤں کا خطرہ برقرار ہے۔ کئی علاقوں میں ہواؤں کی رفتار 70 سے 80 کلومیٹر فی گھنٹہ تک پہنچنے کا امکان ظاہر کیا گیا ہے۔

محکمہ موسمیات کے مطابق اس وقت مشرقی بھارت میں مغربی بنگال اور بنگلہ دیش کے اوپر فضا میں بننے والا طاقتور سائیکلونک سرکولیشن خلیج بنگال سے مسلسل نمی کھینچ رہا ہے، جس کے باعث بارش کا سلسلہ مزید شدت اختیار کر رہا ہے۔ دوسری جانب وسطی اتر پردیش کے اوپر فعال کم دباؤ کا علاقہ شمالی بھارت کے موسم کو متاثر کر رہا ہے، جس سے پہاڑی اور میدانی دونوں علاقوں میں خطرات بڑھ گئے ہیں۔دارالحکومت دہلی اور این سی آر میں آج شدید بارش اور تیز آندھی کا یلو الرٹ جاری کیا گیا ہے۔ محکمہ موسمیات کے مطابق زیادہ سے زیادہ درجہ حرارت 37 اور کم سے کم 29 ڈگری سیلسیس رہنے کا امکان ہے۔ بارش کے بعد نمی میں اضافہ ہوگا جبکہ نشیبی علاقوں میں پانی جمع ہونے اور ٹریفک جام کی صورتحال پیدا ہو سکتی ہے۔ شہریوں کو غیر ضروری سفر سے گریز کرنے کی ہدایت دی گئی ہے۔

اتر پردیش میں میرٹھ، آگرہ، متھرا، کانپور، بہرائچ، گورکھپور اور رائے بریلی سمیت متعدد اضلاع میں تیز بارش اور آندھی کی پیش گوئی کی گئی ہے۔ بہار میں پٹنہ، گیا، چمپارن، مظفرپور اور پورنیہ سمیت کئی اضلاع میں موسلادھار بارش اور آسمانی بجلی گرنے کا خدشہ ہے، جبکہ دریاؤں کی سطح بلند ہونے سے نشیبی علاقوں میں سیلاب کا خطرہ بھی بڑھ گیا ہے۔محکمہ موسمیات کے مطابق 11 جولائی کو دہلی میں زیادہ سے زیادہ درجہ حرارت 36 ڈگری سیلسیس اور کم سے کم 25 ڈگری سیلسیس رہنے کا امکان ہے۔ دن بھر کہیں کہیں گرج چمک کے ساتھ ہلکی بارش ہو سکتی ہے، جبکہ ہوا میں نمی کی شرح 80 سے 85 فیصد کے درمیان رہنے کی توقع ہے۔ محکمہ نے بعض علاقوں میں آندھی اور بارش کا بھی امکان ظاہر کیا ہے، جبکہ 12 جولائی بروز اتوار آسمان پر گھنے بادل چھائے رہنے کی پیش گوئی کی گئی ہے۔

بھارت ایکسپریس اردو