Independence Day: یوم آزادی کی تقریبات سے قبل دہلی پولیس کی ٹریفک ایڈوائزری جاری، کئی راستے رہیں گے بند

نئی دہلی : دارالحکومت دہلی میں یومِ آزادی کی تقریبات سے قبل دہلی ٹریفک پولیس نے اہم ٹریفک ایڈوائزری جاری کردی ہے۔ 15 اگست کو لال قلعہ میں یوم آزادی کی تقریب کے پیش نظر عوام کی حفاظت اور ٹریفک کی روانی برقرار رکھنے کے لیے صبح 4 بجے سے 10 بجے تک کئی سڑکوں پر ٹریفک پابندیاں، روٹ ڈائیورژن اور گاڑیوں کی آمدورفت سے متعلق خصوصی انتظامات نافذ رہیں گے۔ٹریفک پولیس نے شہریوں کو مشورہ دیا ہے کہ وہ پابندی والی سڑکوں پر جانے سے گریز کریں اور متبادل راستوں کا استعمال کریں۔ پولیس نے مسافروں سے یہ بھی اپیل کی ہے کہ وہ اپنی سفر کی منصوبہ بندی پہلے سے کریں اور اضافی وقت لے کر گھر سے نکلیں۔ ایڈوائزری میں ٹریفک سگنلز، ویری ایبل میسج سائنز (وی ایم ایس) اور ٹریفک پولیس اہلکاروں کی ہدایات پر عمل کرنے کی بھی اپیل کی گئی ہے۔دہلی ٹریفک پولیس نے شہریوں سے اپیل کی ہے کہ یومِ آزادی 2026 کے دوران محفوظ اور ہموار ٹریفک نظام کو یقینی بنانے میں تعاون کریں۔ پولیس کے مطابق شہری غیر ضروری طور پر حساس اور پابندی والے علاقوں کا رخ نہ کریں اور اپنی منزل تک پہنچنے کے لیے متبادل راستوں کا انتخاب کریں۔

لال قلعہ کے آس پاس کئی راستے رہیں گے بند

15 اگست کو لال قلعہ اور اس کے آس پاس کے علاقوں میں عام ٹریفک کے لیے کئی راستے صبح 4 بجے سے 10 بجے تک بند رہیں گے۔ ان راستوں پر صرف درست لیبل والے مجاز گاڑیوں کو ہی داخلے کی اجازت دی جائے گی۔پولیس کے مطابق نیتاجی سبھاش مارگ پر دہلی گیٹ سے چھتا ریل چوک تک، لوتھیان روڈ پر جی پی او دہلی سے چھتا ریل چوک تک، ایس پی مکھرجی مارگ پر ایچ سی سین مارگ سے یمنا بازار چوک تک ٹریفک متاثر رہے گی۔ اس کے علاوہ چاندنی چوک روڈ پر فاؤنٹین چوک سے لال قلعہ، نشاد راج مارگ پر رنگ روڈ سے نیتاجی سبھاش مارگ، ایسپلینیڈ روڈ اور لنک روڈ سے نیتاجی سبھاش مارگ، رنگ روڈ پر راج گھاٹ سے آئی ایس بی ٹی اور کشمیری گیٹ کے اطراف بھی ٹریفک پابندیاں نافذ رہیں گی۔

ان راستوں سے سفر کرنے سے کریں  گریز

ٹریفک پولیس نے شہریوں کو کئی اہم سڑکوں سے سفر کرنے سے بھی گریز کرنے کا مشورہ دیا ہے۔ ان میں سی ہیکساگون، انڈیا گیٹ، کاپرنیکس مارگ، منڈی ہاؤس، تلک مارگ، متھرا روڈ، بی ایس زیڈ مارگ، نیتاجی سبھاش مارگ اور جواہر لال نہرو مارگ شامل ہیں۔اس کے علاوہ نظام الدین کھٹا اور آئی ایس بی ٹی کے درمیان رنگ روڈ، سلیم گڑھ بائی پاس کے ذریعے کشمیری گیٹ اور آؤٹر رنگ روڈ کے راستوں پر بھی ٹریفک دباؤ اور پابندیوں کا امکان ہے۔ پولیس نے شہریوں سے اپیل کی ہے کہ وہ ان علاقوں میں غیر ضروری سفر سے گریز کریں۔

یومِ آزادی سے پہلے سکیورٹی سخت

یومِ آزادی کی تقریبات کے پیش نظر دہلی پولیس نے پوری قومی راجدھانی میں سکیورٹی انتظامات مزید سخت کردیئے ہیں۔ پروگرام کے دوران کسی بھی ناخوشگوار واقعے سے بچنے اور تقریبات کو پرامن طریقے سے مکمل کرانے کے لیے پولیس گشت، گاڑیوں کی چیکنگ، ڈرون نگرانی اور مختلف مقامات پر ’مک ڈرل‘ کر رہی ہے۔دہلی کی سرحدوں، بھیڑ بھاڑ والے بازاروں، مالز، ہوٹلوں، عوامی مقامات اور دیگر حساس علاقوں میں بھی سکیورٹی بڑھا دی گئی ہے۔ پولیس نے شہریوں سے تعاون کرنے اور کسی بھی مشتبہ سرگرمی کی اطلاع فوری طور پر متعلقہ حکام کو دینے کی اپیل کی ہے۔

بھارت ایکسپریس اردو