Delhi-NCR Weather Today: دہلی-این سی آر میں سردی اور گھنے کہرے کا قہر،، اے کیو آئی 482 کی خطرناک سطح پر، سردی کےپیش نظر یلو الرٹ جاری

نئی دہلی :دہلی میں جنوری کی شدید سردی نے عوام کی مشکلات میں اضافہ کر دیا ہے۔ 15 جنوری کو دارالحکومت میں کم از کم درجۂ حرارت تقریباً 4 ڈگری سیلسیس ریکارڈ کیا گیا، جو اس سیزن کی کم ترین سطحوں میں شمار ہوتا ہے۔ صبح کے وقت گھنے کہرے نے حالات کو مزید سنگین بنا دیا۔ کئی علاقوں میں حدِ نگاہ 50 میٹر سے بھی کم رہی، جس کے باعث سڑک، ریل اور فضائی آمد و رفت بری طرح متاثر ہوئی۔ محکمۂ موسمیات نے سردی کے پیشِ نظر یلو الرٹ جاری کیا ہے۔ اس کے ساتھ ہی اگلے دو گھنٹوں کے لیے دہلی کے مختلف علاقوں میں معتدل سے لے کر انتہائی گھنے کوہرے کی وارننگ دی گئی ہے۔ محکمۂ موسمیات کے مطابق جمعرات، 15 جنوری یعنی مکر سنکرانتی کی صبح بعض علاقوں میں درجۂ حرارت 2 ڈگری سیلسیس تک درج کیا گیا۔

سرد لہر اور تیز ہواؤں سے کپکپی میں اضافہ

بھارت کے محکمۂ موسمیات (آئی ایم ڈی) کے مطابق 16 جنوری تک دہلی کے کچھ حصوں میں سرد لہر برقرار رہ سکتی ہے۔ آج دن بھر آسمان پر بادل چھائے رہنے کا امکان ہے، جس کی وجہ سے دھوپ نکلنے کے امکانات کم ہیں۔اس کے ساتھ ہی تقریباً 19 کلومیٹر فی گھنٹہ کی رفتار سے ٹھنڈی ہوائیں چلنے کا امکان ہے، جن کے باعث سردی کا احساس مزید بڑھ جائے گا۔ اندازہ ہے کہ آج زیادہ سے زیادہ درجۂ حرارت 21 ڈگری سیلسیس کے آس پاس رہے گا۔

انتہائی خراب فضائی آلودگی

سردی اور کہرے کے ساتھ ساتھ دہلی کی ہوا بھی نہایت خراب حالت میں ہے۔ دارالحکومت کا ایئر کوالٹی انڈیکس  482 کی سطح پر پہنچ گیا ہے، جو صحت کے لیے انتہائی خطرناک مانا جاتا ہے۔ ڈاکٹروں نے مشورہ دیا ہے کہ بزرگ افراد، بچے اور سانس کے امراض میں مبتلا لوگ صبح اور شام کے وقت گھروں سے باہر نکلنے سے گریز کریں۔

کب ملے گی سردی سے راحت؟

آئی ایم ڈی کے مطابق 17 اور 18 جنوری سے درجۂ حرارت میں بتدریج اضافہ دیکھنے کو مل سکتا ہے۔ اس دوران زیادہ سے زیادہ درجۂ حرارت میں 3 سے 5 ڈگری تک اضافہ ممکن ہے، جس سے دن کے وقت کچھ راحت ملے گی۔ تاہم 18 سے 19 جنوری کے درمیان ہلکی بارش یا بوندا باندی کا امکان ہے، جس سے صبح کی سردی دوبارہ بڑھ سکتی ہے۔محکمۂ موسمیات کا کہنا ہے کہ 16 سے 20 جنوری کے درمیان زیادہ سے زیادہ درجۂ حرارت بڑھ کر 25 ڈگری سیلسیس تک پہنچ سکتا ہے اور کم از کم درجۂ حرارت بھی 10 ڈگری کے قریب رہ سکتا ہے۔ لیکن 20 سے 25 جنوری کے دوران ایک مغربی اضطراب کے اثر سے بارش اور اولہ باری کا امکان ظاہر کیا گیا ہے۔ایسی صورت میں درجۂ حرارت میں ایک بار پھر کمی آ سکتی ہے اور سردی کی شدت دوبارہ بڑھ سکتی ہے۔ مجموعی طور پر آنے والے دنوں میں دہلی کا موسم بار بار کروٹ بدلتا ہوا نظر آئے گا۔

بھارت ایکسپریس اردو