Delhi’s air quality remained “Hazardous” category: دہلی میں ہوا کا معیار انتہائی خطرناک زمرے میں، اے کیو آئی 482 تک پہنچا، کئی علاقوں میں فضائی آلودگی سنگین سطح پر

نئی دہلی: قومی راجدھانی دہلی میں جمعرات کی صبح فضائی آلودگی کی صورت حال انتہائی تشویش ناک رہی۔ صبح 8 بج کر ایک منٹ پر مجموعی ایئر کوالٹی انڈیکس (اے کیو آئی) 482 درج کیا گیا، جو خطرناک حد کے قریب ہے۔ شہر کے کئی علاقوں میں آلودگی کی سطح سنگین زمرے میں برقرار رہی۔ مرکزی آلودگی کنٹرول بورڈ (سی پی سی بی) کے اعداد و شمار کے مطابق، دہلی کے سات مانیٹرنگ اسٹیشنوں پر اے کیو آئی 400 سے زیادہ ریکارڈ کیا گیا، جو ’سنگین‘ زمرے میں آتا ہے۔

پنجابی باغ میں سب سے زیادہ آلودگی ریکارڈ

سی پی سی بی کے مطابق، پنجابی باغ میں سب سے زیادہ 446 اے کیو آئی درج کیا گیا۔ اس کے بعد نریلا میں 434، روہنی میں 431، آر کے پورم میں 416، بوانا میں 412، دہلی یونیورسٹی کے نارتھ کیمپس میں 408 اور پٹپڑ گنج میں 405 اے کیو آئی ریکارڈ کیا گیا۔ دہلی کے دیگر علاقوں میں بھی فضائی معیار انتہائی خراب رہا۔ اوکھلا فیز-2 اور انڈیا گیٹ میں 399، آئی ٹی او میں 397، دوارکا سیکٹر-8 میں 396، چاندنی چوک میں 356 اور وسندھرا انکلیو میں 330 اے کیو آئی درج کیا گیا۔ وہیں آنند وہار میں اے کیو آئی 293 اور آئی ایم ڈی لودھی روڈ اسٹیشن پر 268 ریکارڈ کیا گیا، جو ’خراب‘ زمرے میں شامل ہے۔

حالات پر نظر رکھے ہوئے ہے مرکزی حکومت

دہلی میں فضائی آلودگی کی سطح سنگین زمرے میں پہنچنے کے درمیان مرکزی وزیر ماحولیات بھوپیندر یادو نے منگل کو کہا تھا کہ مرکز کا فضائی معیار سے متعلق پینل موسمی حالات، ہوا کی سمت، رفتار اور فضائی نقل و حرکت پر مسلسل نظر رکھے ہوئے ہے۔ انہوں نے یقین دلایا کہ صورت حال کے جائزے کی بنیاد پر ضروری اقدامات کیے جا رہے ہیں۔ انہوں نے کہا کہ فضائی معیار کے انتظام سے متعلق کمیشن (سی اے کیو ایم) ہوا کی سمت، رفتار اور فضائی نقل و حرکت کی مسلسل نگرانی کر رہا ہے اور اسی جائزے کی بنیاد پر ضروری کارروائی کی جا رہی ہے۔

پرالی جلانے کے واقعات میں کمی کا دعویٰ

مرکزی وزیر نے یہ بھی کہا تھا کہ گزشتہ برسوں کے مقابلے میں پرالی جلانے کے واقعات میں کمی آئی ہے۔ حکومت کے مطابق، دھان کی پرالی کے ایک بڑے حصے کو کھیتوں سے باہر متبادل طریقوں سے استعمال کیا گیا ہے۔ پنجاب، ہریانہ، راجستھان اور اتر پردیش سمیت پڑوسی ریاستوں میں پرالی جلانے کے واقعات میں کمی سے متعلق سوال پر بھوپیندر یادو نے کہا تھا کہ اس بار تقریباً 40 فیصد دھان کی پرالی کو متبادل طریقوں سے استعمال کیا گیا ہے۔ تاہم، ان اقدامات کے باوجود فضائی آلودگی سنگین زمرے میں برقرار رہنے کے سوال پر انہوں نے کہا کہ سی اے کیو ایم موسمی حالات کا مسلسل جائزہ لے رہا ہے اور اسی کے مطابق ضروری اقدامات کیے جا رہے ہیں۔

بھارت ایکسپریس اردو۔