Oppression on Dalits: اترپردیش میں ’’میرج ہال‘‘ میں شادی کرنے پر دلت دولہے اور اس کے رشتہ داروں پر لاٹھیوں اور سلاخوں سے حملہ، اب تک کوئی گرفتاری نہیں

پولیس نے اتوار کو بتایا کہ اتر پردیش کے رسرا میں شادی ہال میں شادی کی تقریب منعقد کرنے کے سبب ایک دلت خاندان پر مبینہ طور پر لاٹھیوں اور سلاخوں سے حملہ کیا گیا۔ یہ واقعہ جمعہ کی رات پیش آیا جس میں دو افراد شدید زخمی ہوگئے۔ فرسٹ انفارمیشن رپورٹ (ایف آئی آر) کے مطابق حملہ آوروں نے مبینہ طور پر حملہ کرتے ہوئے کہا ’’دلت برادری سے ہو کے تم ایک ہال میں شادی کیسے کر سکتے ہو؟‘‘

اس واقعے کے سلسلے میں ابھی تک کوئی گرفتاری عمل میں نہیں آئی ہے۔ متاثرہ دولہے کے بھائی رگھویندر گوتم کی طرف سے درج کرائی گئی ایف آئی آر میں کہا گیا ہے کہ تقریباً 20 افراد کے ایک گروپ نے لاٹھیوں اور سلاخوں سے لیس تقریباً 10:30 بجے میرج ہال پر دھاوا بول دیا اور شادی میں شرکت کرنے والوں پر حملہ کیا۔

حملے میں دولہے کے رشتہ دار ہوئے ہیں زخمی

مبینہ طور پر اس گروپ کی قیادت امن ساہنی، دیپک ساہنی، راہل اور اکھلیش کے ساتھ علاقے کے 15-20 دیگر نامعلوم افراد کر رہے تھے۔ ملزمین نے مبینہ طور پر ذات پات کی بنیاد پر گالی گلوچ بھی کی اور تقریب کے لیے شادی ہال استعمال کرنے پر دلت برادری کے ارکان پر اعتراض کیا۔

اس حملے میں گوتم کے رشتہ دار اجے کمار اور منان کانت کو شدید چوٹیں آئیں اور ان کا علاج چل رہا ہے۔ بھارتیہ نیائے سنہتا (بی این ایس) کی متعلقہ دفعات کے ساتھ درج فہرست ذات اور درج فہرست قبائل (مظالم کی روک تھام) ایکٹ کی دفعات کے تحت مقدمہ درج کیا گیا ہے۔ رسرا پولیس اسٹیشن کے انچارج وپن سنگھ نے تصدیق کی کہ معاملے کی تحقیقات جاری ہے۔

بھارت ایکسپریس اردو