Swati Maliwal Assault Case: سواتی مالیوال کیس: عدالت نے وبھو کمار کو 4 دن کے لئے عدالتی تحویل میں بھیجا

 

وبھو کمار کو سواتی مالیوال کیس میں عدالت نے چار دن کی عدالتی حراست میں بھیج دیا ہے۔ تیس ہزاری کورٹ کے حکم کے مطابق وبھو کمار 28 مئی تک عدالتی حراست میں رہیں گے۔ وبھو کو آج (24 مئی) عدالت میں پیش کیا گیا، پولس نے چار دن کی عدالتی تحویل کی مانگ کی تھی، جسے عدالت نے قبول کرلیا۔

دہلی پولیس نے کہا کہ عدالت کی ہدایت کے مطابق ہم نے اہل خانہ اور وکیل کو وبھو کمار سے ملنے کی اجازت دی تھی۔ وبھو کمار کے وکیل نے کہا کہ عدالتی حراست یا پولیس حراست دونوں ہی ملزم کی آزادی کو متاثر کرتے ہیں۔ کسی بھی چیز کا مطالبہ معقول ہونا چاہیے۔ وبھو کمار کے وکیل نے کہا کہ عدالتی حراست 14 دن کی ہے لیکن پولیس 4 دن کی عدالتی تحویل کا مطالبہ کر رہی ہے۔

سرکاری وکیل نے وبھو کمارکی درخواست کی مخالفت کی۔

سرکاری وکیل اتل سریواستو نے عدالت میں کہا کہ سی سی ٹی وی ملزم کے قبضے میں نہیں ہے۔ ملزمان کی جانب سے دی گئی پین ڈرائیوز خالی پائی گئیں۔ جسے ایف ایس ایل بھیج دیا گیا ہے۔ وبھو کمارنے تفتیش کے دوران ضبط شدہ ڈی وی آر کو محفوظ رکھنے کی اپیل کی تھی، جس کے خلاف اتل سریواستو نے کہا کہ یہ درخواست دائر کرنے کی جگہ نہیں ہے اور اسے مسترد کر دینا چاہیے۔

سواتی مالیوال نے الزام لگایا تھا کہ 13 مئی کو سی ایم کی رہائش گاہ پر ان کے ساتھ حملہ کیا گیا تھا۔ ملزم وبھو کمار کو واقعہ کے پانچ دن بعد گرفتار کیا گیا تھا۔ اس کے بعد عدالت نے اسے پانچ دن کے لیے پولیس حراست میں بھیج دیا۔ پولیس حراست کی مدت ختم ہونے کے بعد انہیں عدالت میں پیش کیا گیا۔

پولیس پر فون فارمیٹ کرنے کا الزام

پچھلی بار جب وبھو کمار کو عدالت میں پیش کیا گیا تو دہلی پولیس نے الزام لگایا تھا کہ وبھو کمار کا فون ممبئی میں فارمیٹ کیا گیا ہو گا۔ اس کے بعد پولیس وبھاو کو بھی ممبئی لے گئی۔ پولیس نے عدالت کو بتایا تھا کہ وبھو کمار کو اسی جگہ لے جایا جائے گا جہاں فون فارمیٹ کیا گیا تھا۔ تفتیش کے بعد وبھو کمارکو دہلی واپس لایا گیا۔

بھارت ایکسپریس۔