Pimpri Chinchwad crime rate: پمپری چنچواڑ میں جرائم شرح میں ریکارڈ کمی، پولیس نےاس کا سہرا بڑھائی گئی نگرانی ٹیم کے سر باندھا

پونے: پمپری چنچواڑ میں جرائم کی شرح میں نمایاں کمی ریکارڈ کی گئی ہے۔ پولیس نے اس کی وجہ نگرانی میں اضافہ قرار دیا ہے۔مجموعی طور پر سنگین جرائم جیسے قتل، قتل کی کوشش، عصمت دری، ڈکیتی اور لوٹ مار کے معاملات سال 2025 میں کم ہو کر 6,904 رہ گئے، جبکہ 2024 میں یہ تعداد 7,125 تھی۔ گزشتہ سال عصمت دری کے 301 اور چھیڑ چھاڑ کے 392 مقدمات درج کیے گئے۔ چوبے نے بتایا کہ ’’عصمت دری کے 299 اور چھیڑ چھاڑ کے 376 معاملات میں ملزمان متاثرین یا ان کے اہلِ خانہ کے جاننے والے تھے۔ مجموعی عصمت دری کے مقدمات میں سے 120 شادی کے وعدے پر جنسی استحصال سے متعلق تھے۔ چھیڑ چھاڑ کے 9 واقعات نامعلوم افراد کے ذریعے انجام دیے گئے، جبکہ 7 معاملات میں سوشل میڈیا پلیٹ فارمز کا استعمال کیا گیا۔‘‘

خصوصی مہمات اور مؤثر تفتیشی کارروائیاں

پولیس ریکارڈ پر موجود مجرموں کے خلاف پیشگی کارروائی، غیر قانونی ہتھیاروں کے خلاف خصوصی مہمات اور مؤثر تفتیشی کارروائیوں نے سنگین اور سڑکوں پر ہونے والے جرائم میں کمی لانے میں مدد دی ہے۔ انہوں نے کہا، ’’گزشتہ سال ہم نے 253 مجرموں کو گرفتار کر کے 243 دیسی ساختہ پستول اور 1,066 مجرموں سے 908 نوکیلے ہتھیار ضبط کیے۔‘‘جسمانی جرائم کے معاملات 2024 میں 1,183 سے کم ہو کر گزشتہ سال 1,087 رہ گئے، جبکہ املاک سے متعلق جرائم 2024 میں 2,474 کے مقابلے میں 2025 میں گھٹ کر 2,129 ہو گئے۔ پولیس چیف نے بتایا، ’’ہم نے منظم جرائم پیشہ گروہوں پر مؤثر قدغن لگانے پر خصوصی توجہ دی۔ ایسے 45 گروہوں سے وابستہ کُل 213 ملزمان کے خلاف سخت ایم سی او سی اے قوانین کے تحت مقدمات درج کیے گئے، جبکہ 368 دیگر افراد کو شہر بدر کیا گیا اور 35 کو مہاراشٹر پریوینشن آف ڈینجرس ایکٹیوٹیز (ایم پی ڈی اے) ایکٹ کے تحت حفاظتی حراست میں رکھا گیا۔‘‘ چوبے نے یہ بھی کہا کہ 2025 میں ’’پیشہ ورانہ جرائم‘‘ جیسے نقب زنی (چوری) کے واقعات میں بھی کمی آئی ہے۔ ’’ان جرائم میں عموماً کوئی گواہ نہیں ہوتا، اس لیے ان کی تفتیش کے لیے خاص مہارت اور محنت درکار ہوتی ہے۔ گزشتہ سال ایسے مقدمات 2024 کے 311 کے مقابلے میں کم ہو کر 285 رہ گئے،‘‘ کمشنر نے بتایا۔

اب تک 50 کروڑ روپے موصول ہو چکے ہیں

چوبے کے مطابق، پمپری چنچوڑ پولیس نے واکڈ کے کاویری نگر پولیس کالونی میں اپنا علیحدہ پولیس اسپتال بھی شروع کیا ہے، جو پولیس افسران، اہلکاروں اور ان کے اہلِ خانہ کو طبی سہولیات فراہم کرتا ہے۔ انہوں نے مزید کہا، ’’چکھلی میں نئے پولیس کمشنر آفس کی تعمیر شروع ہو چکی ہے، جس کے لیے اب تک 50 کروڑ روپے موصول ہو چکے ہیں۔ اسی طرح پمپری میں ایک رہائشی کالونی کا منصوبہ بنایا گیا ہے جہاں سینئر پولیس افسران اور اہلکاروں کے لیے 200 فلیٹس تعمیر کیے جا رہے ہیں۔ وہاں ایک نیا پمپری پولیس اسٹیشن اور ڈپٹی کمشنر آف پولیس (زون-اوّل) کا دفتر بھی قائم کیا جائے گا۔‘‘ کمشنر نے بتایا کہ پولیس کی ’’ٹریفک بڈی ایپ‘‘ اور بزرگ شہریوں کے لیے ’’جیشٹھانوبندھ ایپ‘‘ کو بھی عوام کی جانب سے اچھا ردِعمل مل رہا ہے۔

بھارت ایکسپریس اردو۔