Congress harmed the country’s security: کانگریس نے شمال مشرق کو ترقی سے محروم رکھ کر ملک کی سلامتی کو نقصان پہنچایا: وزیر اعظم مودی

گوہاٹی: وزیر اعظم نریندر مودی نے کہا ہے کہ کانگریس نے برسوں تک شمال مشرقی ریاستوں، خصوصاً آسام کو ترقی سے محروم رکھ کر نہ صرف خطے بلکہ ملک کی سلامتی کو بھی گہرا نقصان پہنچایا۔ انہوں نے کہا کہ گزشتہ 10 سے 11 برسوں کے دوران مرکزی حکومت نے اس صورتحال کو بدلنے کی سنجیدہ کوشش کی ہے تاکہ آسام کے وسائل کا فائدہ صرف اور صرف وہاں کی عوام کو ملے۔

گوہاٹی ایئرپورٹ کے نئے ٹرمینل کا افتتاح

وزیراعظم نریندر مودی نے ہفتے کے روز آسام کے دورے کے دوران گوہاٹی میں واقع لوک پریہ گوپی ناتھ بردولوئی بین الاقوامی ہوائی اڈے کے نئے ٹرمینل کا افتتاح کیا۔ اس موقع پر انہوں نے کہا کہ یہ نیا ٹرمینل نہ صرف مقامی معیشت کو تقویت دے گا بلکہ سیاحت کے فروغ میں بھی اہم کردار ادا کرے گا۔ انہوں نے کہا کہ اس ٹرمینل میں تکنیکی جدت، قدرتی حسن اور جدید ٹرانسپورٹ نظام کا حسین امتزاج دیکھنے کو ملتا ہے۔

آسام کے بی جے پی لیڈروں سے ملاقات

افتتاح کے بعد وزیراعظم نے آسام بی جے پی کے ریاستی ہیڈکوارٹر کا دورہ کیا اور پارٹی رہنماؤں و کارکنان سے گفتگو کی۔ وزیر اعظم نے سوشل میڈیا پلیٹ فارم ایکس پر بتایا کہ اس ملاقات میں عوام سے پارٹی کے ربط کو مزید مضبوط بنانے اور ان کی امنگوں کو پورا کرنے کے طریقوں پر تبادلۂ خیال کیا گیا۔

گوپی ناتھ بردولوئی کے مجسمے کی نقاب کشائی

وزیراعظم مودی نے کہا کہ گوہاٹی ہوائی اڈے پر آسام کے عظیم رہنما لوک پریہ گوپی ناتھ بردولوئی کے مجسمے کی نقاب کشائی بھی کی گئی۔ انہوں نے کہا کہ بردولوئی کی مثالی زندگی اور آسام کی ترقی میں ان کی بے مثال خدمات آنے والی نسلوں کے لیے ہمیشہ مشعلِ راہ بنی رہیں گی۔

کانگریس پر شدید تنقید

کانگریس کو تنقید کا نشانہ بناتے ہوئے وزیر اعظم نے کہا کہ آسام اور پورے شمال مشرق کو ترقی سے دور رکھنا ایک ایسا گناہ تھا جس نے ملک کی سلامتی کو کمزور کیا۔ انہوں نے کہا کہ موجودہ حکومت نے اس خطے میں بنیادی ڈھانچے، رابطہ کاری اور اقتصادی مواقع کو فروغ دے کر حالات بدلنے کی کوشش کی ہے۔

ترقی اور سیاحت پر زور

وزیر اعظم نے کہا کہ آج آسام پورے شمال مشرقی بھارت کے لیے ترقی اور سیاحت کا ایک نیا دروازہ بن چکا ہے۔ انہوں نے وارانسی سے ڈبروگڑھ تک چلنے والے گنگا ولاس کروز کا حوالہ دیتے ہوئے کہا کہ اس منصوبے نے شمال مشرقی بھارت کو عالمی کروز سیاحت کے نقشے پر نمایاں مقام دلایا ہے۔

رابطہ کاری، تجارت اور سیاحت کو نئی رفتار

وزیر اعظم مودی نے ایکس پر اپنے پیغام میں کہا کہ لوک پریہ گوپیناتھ بردولوی بین الاقوامی ہوائی اڈے کی نئی ٹرمینل عمارت پورے آسام اور شمال مشرق میں رابطہ کاری، تجارت اور سیاحت کو نئی رفتار دے گی اور خطے کو عالمی سطح پر مضبوط طور پر جوڑنے میں مددگار ثابت ہوگی۔

بھارت ایکسپریس اردو۔