Classs 10 Dropout Inspiring Story: دسویں جماعت ادھوری چھوڑنے والے شخص نے کھڑی کی 13 ہزار کروڑ روپے کی انجینئرنگ کمپنی، جانیے راکیش چوپدار کی متاثر کن کامیابی کی کہانی

حیدرآباد سے تعلق رکھنے والے صنعت کار راکیش چوپدار، جو آزاد انجینئرنگ کے بانی ہیں، نے تعلیمی ناکامی کو اپنی کمزوری بنانے کے بجائے اسے غیرمعمولی کاروباری کامیابی میں بدل دیا۔

تعلیمی ناکامی نے دی نئی راہ

دسویں جماعت کے امتحان میں ناکام ہونے کے بعد انہیں تعلیم ادھوری چھوڑنی پڑی، لیکن انہوں نے اس ناکامی کو اپنی منزل کی راہ میں رکاوٹ نہیں بننے دیا۔ اس کے بجائے وہ اپنے والد کے چھوٹے سے فاسٹنر مینوفیکچرنگ کاروبار سے وابستہ ہو گئے، جہاں انہوں نے مشینری، پیداواری عمل اور انجینئرنگ کے عملی پہلوؤں کو قریب سے سیکھا۔ یہی تجربہ بعد میں بھارت کی صفِ اول کی ہائی پریسیژن انجینئرنگ کمپنی کی بنیاد بنا۔تقریباً 12 برس تک صنعت کے مختلف پہلوؤں کا عملی تجربہ حاصل کرنے کے بعد راکیش چوپدار نے 2008 میں آزاد انجینئرنگ کی بنیاد رکھی۔

چھوٹے سے ورکشاپ اور ایک استعمال شدہ سی این سی مشین کے ساتھ کمپنی کا آغاز

حیدرآباد کے بالانگر علاقے میں صرف 200 مربع میٹر کے ایک چھوٹے سے ورکشاپ اور ایک استعمال شدہ سی این سی مشین کے ساتھ کمپنی کا آغاز کیا گیا۔ محدود وسائل کے باوجود کمپنی نے ہائی پریسیژن انجینئرنگ پرزہ جات تیار کرنے پر اپنی توجہ مرکوز رکھی۔کمپنی کی کامیابی کا اہم موڑ اس وقت آیا جب ایک غیرملکی گاہک نے جیٹ انجن میں استعمال ہونے والے ایک پیچیدہ ایئر فائل پرزے کی تیاری کے لیے قابل اعتماد صنعت کار کی تلاش کی۔ راکیش چوپدار نے یہ چیلنج قبول کیا اور کئی ماہ کی تحقیق اور انتہائی باریک بینی سے تیاری کے بعد مطلوبہ پرزہ کامیابی سے تیار کر کے فراہم کر دیا۔ اس کامیابی نے آزاد انجینئرنگ کو عالمی سطح پر پہچان دلائی اور بین الاقوامی مارکیٹ کے دروازے کھول دیے۔

آزاد انجینئرنگ کیا کیا تیار کرتی ہے؟

آج آزاد انجینئرنگ فضائی، دفاعی، توانائی اور تیل و گیس کے شعبوں کے لیے جدید اور انتہائی معیاری انجینئرنگ پرزے تیار کرتی ہے۔جدت، اعلیٰ معیار اور درستگی کے عزم کی بدولت کمپنی نے دنیا کی معروف کمپنیوں، جن میں بوئنگ، رولز رائس اور جی ای شامل ہیں، کا اعتماد حاصل کیا ہے۔ اس کے علاوہ کمپنی بھارت کی ڈیفنس ریسرچ اینڈ ڈیولپمنٹ آرگنائزیشن (DRDO) کے منصوبوں پر بھی کام کر رہی ہے۔صرف 2 کروڑ روپے کی ابتدائی سرمایہ کاری سے شروع ہونے والا یہ کاروبار آج بھارت کی نمایاں ہائی پریسیژن انجینئرنگ کمپنیوں میں شمار ہوتا ہے۔

مالی سال 25-2024 میں کمپنی نے تقریباً 400 کروڑ روپے کی آمدنی درج کی، جبکہ اسٹاک مارکیٹ میں لسٹنگ کے بعد اس کی مارکیٹ ویلیو 13 ہزار کروڑ روپے سے تجاوز کر گئی۔راکیش چوپدار کی کامیابی اس بات کا ثبوت ہے کہ عزم، عملی سیکھنے کا جذبہ اور جدت طرازی انسان کو ناکامیوں سے نکال کر غیرمعمولی کاروباری کامیابی تک پہنچا سکتی ہے۔

بھارت ایکسپریس اردو۔