Canada’s PM Carney to visit India: کینیڈا کے وزیراعظم مارک کارنی جلد کریں گے بھارت کا دورہ، امریکی محصولات کے بیچ تجارتی تنوع پر زور

کینیڈا کے وزیراعظم مارک کارنی آئندہ چند ہفتوں میں بھارت کا دورہ کرنے والے ہیں۔ یہ دورہ ایسے وقت میں متوقع ہے جب کینیڈا اپنی عالمی تجارت کو متنوع بنانے کی کوششوں میں مصروف ہے اور امریکہ کی جانب سے عائد بھاری محصولات کے اثرات سے نمٹنے کے لیے نئے شراکت داروں کی تلاش کر رہا ہے۔ یہ بات کینیڈا میں بھارتی ہائی کمشنر دنیش پٹنائک نے کہی۔ کینیڈین نشریاتی ادارے سی بی سی کے پروگرام پاور اینڈ پالیٹکس سے گفتگو کرتے ہوئے دنیش پٹنائک نے بتایا کہ مارک کارنی کا بھارت کا یہ دورہ دو سال سے زائد عرصے کے سفارتی تناؤ کے بعد دو طرفہ تعلقات کو نئی رفتار دینے کی سمت ایک اہم قدم ہوگا۔

تجارتی تنوع پر کینیڈا کی توجہ

دنیش پٹنائک کے مطابق، کینیڈا کے وزیر اعظم کا یہ دورہ خاص طور پر امریکہ کی جانب سے عائد بھاری ٹیرف کے تناظر میں غیر امریکی منڈیوں کی طرف توجہ مرکوز کرنے کے لیے ہے۔ امریکہ نے بھارت کی برآمدات پر 50 فیصد جبکہ کینیڈا پر 35 فیصد تک محصولات عائد کیے ہیں۔ بھارت پر عائد ٹیرف میں سے 25 فیصد روسی تیل کی خریداری سے متعلق بتایا گیا ہے۔ مارک کارنی نے سوشل میڈیا پلیٹ فارم ایکس پر اپنے بیان میں کہا کہ کینیڈا آئندہ ایک دہائی میں اپنی غیر امریکی برآمدات کو دگنا کرے گا تاکہ کینیڈین کاروبار کے لیے نئے مواقع پیدا ہوں اور ہزاروں نئی ملازمتیں وجود میں آئیں۔

بھارت-کینیڈا تعلقات میں بہتری کے آثار

بھارتی ہائی کمشنر نے کہا کہ وزیراعظم کارنی کا دورہ ممکنہ طور پر یکم فروری کو بھارت کا مرکزی بجٹ پیش ہونے کے بعد ہوگا۔ انہوں نے اس پیش رفت کو اس بات کی علامت قرار دیا کہ دونوں ممالک کے درمیان اعتماد کی فضا بحال ہو رہی ہے۔ انہوں نے مزید کہا کہ سفارتی سطح پر اُن منصوبوں کو دوبارہ آگے بڑھایا جا رہا ہے جو تعلقات میں وقتی سردمہری کے باعث تاخیر کا شکار ہوگئے تھے۔

سفارتی کشیدگی کا پس منظر

بھارت اور کینیڈا کے تعلقات میں کشیدگی کا آغاز 2023 میں ہوا تھا، جب بھارت نے کینیڈا میں خالصتانی علیحدگی پسند عناصر کے خلاف نرم رویے پر تشویش ظاہر کی تھی۔ اسی سال اُس وقت کے کینیڈین وزیراعظم جسٹن ٹروڈو نے ایک گردوارے کے باہر ہردیپ سنگھ نجر کے قتل میں بھارتی ایجنٹوں کے ملوث ہونے کا الزام عائد کیا تھا۔ بھارتی حکومت نے ان الزامات کو سختی سے مسترد کرتے ہوئے انہیں بے بنیاد اور مضحکہ خیز قرار دیا۔ دنیش پٹنائک نے واضح کیا کہ حکومت ہند کے خلاف اس معاملے میں کوئی مقدمہ موجود نہیں ہے۔

تجارتی معاہدے اور مستقبل کی حکمت عملی

بھارت اور کینیڈا کے درمیان حالیہ اعلیٰ سطحی ملاقاتوں کے بعد جامع اقتصادی شراکت داری معاہدے (CEPA) پر مذاکرات شروع کرنے پر اتفاق ہوا ہے۔ اس معاہدے کا مقصد 2030 تک دو طرفہ تجارت کو 50 ارب امریکی ڈالر تک پہنچانا ہے۔ اس کے علاوہ، دونوں ممالک نے سفارتی عملے میں اضافہ، عوامی روابط کو مضبوط بنانے اور قانون نافذ کرنے والے اداروں کے درمیان تعاون بڑھانے پر بھی اتفاق کیا ہے۔ مارک کارنی کے مجوزہ دورۂ بھارت کو دونوں ممالک کے تعلقات میں ایک نئے باب کے آغاز کے طور پر دیکھا جا رہا ہے۔

بھارت ایکسپریس اردو۔