PM Modi To Visit Oman: وزیر اعظم مودی کے دورے سے پہلے کابینہ نے بھارت-عمان فری ٹریڈ معاہدے کو دی منظوری

نئی دہلی: وزیر اعظم نریندر مودی کی صدارت میں مرکزی کابینہ نے جمعہ کو بھارت اور عمان کے درمیان تجویز کردہ فری ٹریڈ ایگریمنٹ (ایف ٹی اے) کو منظوری دے دی ہے۔ اس اقدام کا مقصد دونوں ممالک کے درمیان تجارتی اور سرمایہ کاری کے تعلقات کو مزید مضبوط بنانا اور باہمی اقتصادی تعاون کو فروغ دینا ہے۔ یہ منظوری وزیر اعظم کے 15 سے 18 دسمبر تک ہونے والے تین ملکی دورے سے قبل دی گئی ہے، جس میں وہ اردن، ایتھوپیا اور عمان کا دورہ کریں گے۔ اس دورے سے توقع کی جا رہی ہے کہ ملک کی مغربی ایشیا اور افریقہ میں اقتصادی موجودگی مزید مستحکم ہوگی اور نئی سرمایہ کاری کے مواقع پیدا ہوں گے۔

وزیر اعظم مودی اپنے دورے کے آخری مرحلے میں عمان کے سلطان ہیثم بن طارق کے دعوت پر 17 سے 18 دسمبر تک عمان کا دورہ کریں گے۔ یہ دورہ دونوں ممالک کے درمیان سفارتی تعلقات کی 70 ویں سالگرہ کے موقع پر منعقد کیا جا رہا ہے۔ بھارت اور عمان کے تعلقات ایک طویل مدتی اور کثیرالجہتی اسٹریٹجک شراکت داری پر مبنی ہیں، جو مضبوط تجارتی روابط، توانائی کے شعبے میں تعاون اور ثقافتی تعلقات کے ذریعے مزید مستحکم ہیں۔ یہ منظوری عمان کی شورٰا کونسل کی جانب سے فری ٹریڈ ایگریمنٹ کی توثیق کے ایک دن بعد دی گئی۔ یہ تجارتی معاہدہ، جسے جامع اقتصادی شراکت داری کا معاہدہ بھی کہا جاتا ہے، نومبر 2023 میں رسمی مذاکرات کے بعد تیار کیا گیا تھا۔

بھارت اور عمان کے اقتصادی و تجارتی تعلقات مضبوط اور متحرک ہیں۔ ایک سرکاری بیان کے مطابق، مالی سال 2023-24 کے دوران دوطرفہ تجارتی حجم 8.947 ارب امریکی ڈالر رہا، جبکہ مالی سال 2024-25 کے دوران یہ بڑھ کر 10.613 ارب امریکی ڈالر تک پہنچ گیا۔ اس کے علاوہ، کابینہ کی اقتصادی امور کی کمیٹی (سی سی ای اے) نے 2026 کے سیزن کے لیے ناریل کی کم از کم سپورٹ پرائس (ایم ایس پی) اور کوئلے کے صنعتی و برآمدی استعمال کے لیے کول سیتو لنکیج نیلامی پالیسی کی بھی منظوری دی۔

کابینہ کے فیصلے کے مطابق، 2026 سیزن کے لیے ملنگ کھوپرا کی ایم ایس پی 12,027 روپے فی کوئنٹل اور بال کھوپرا کی ایم ایس پی 12,500 روپے فی کوئنٹل مقرر کی گئی ہے۔ یہ ایم ایس پی پچھلے سیزن کے مقابلے میں ملنگ کھوپرا کے لیے 445 روپے اور بال کھوپرا کے لیے 400 روپے زیادہ ہے۔ کوئلہ لنکیج نیلامی پالیسی کے تحت کسی بھی صنعتی استعمال یا برآمد کے لیے کوئلے کی فراہمی کے لیے ‘ کول سیتو’ کے نام سے نئی ونڈو قائم کی گئی ہے، جو این آر ایس لنکیج پالیسی میں شامل کی گئی ہے۔ یہ نئی پالیسی حکومت کی جانب سے کوئلہ شعبے میں کی جانے والی اصلاحات اور بہتر انتظامات کی عکاس ہے۔

بھارت ایکسپریس اردو