Amit Shah in Bihar: ’’لالو اور راہل بن گئے بنگلہ دیشی دراندازوں کے محافظ‘‘—بیگو سرائے میں انتخابی جلسے سے خطاب کرتے ہوئے امت شاہ کا بڑا بیان

بیگو سرائے (بہار): مرکزی وزیر داخلہ امت شاہ نے بدھ کے روز بیگو سرائے میں انتخابی جلسے سے خطاب کرتے ہوئے آر جے ڈی سربراہ لالو پرساد یادو اور کانگریس رہنما راہل گاندھی پر الزام عائد کیا کہ وہ ’’دراندازوں کے محافظ‘‘ بن گئے ہیں۔ امت شاہ نے کہا کہ اگر بی جے پی بہار میں حکومت بناتی ہے تو ہر ایک درانداز کو ریاست سے باہر نکال دیا جائے گا۔

’گھسپیٹھیا بچاؤ یاترا‘ کے ذریعہ طنز

امت شاہ نے اپنے خطاب میں کہا، ’’راہل بابا ڈیڑھ ماہ پہلے یہاں آئے تھے، اب ایک مہینے بعد دوبارہ آئے ہیں۔ جب وہ پہلی بار آئے تھے تو انہوں نے ’گھسپیٹھیا بچاؤ یاترا‘ نکالی تھی۔ میں بیگو سرائے کے عوام سے پوچھنا چاہتا ہوں، کیا بنگلہ دیشی دراندازوں کو بہار کے ووٹر لسٹ میں شامل کیا جائے؟‘‘ انہوں نے کہا کہ اگر بی جے پی کے چاروں امیدوار جیتتے ہیں تو پارٹی ہر درانداز کو چن چن کر بہار سے نکال دے گی۔ ’’لالو اور راہل دونوں بنگلہ دیشی دراندازوں کے محافظ بن گئے ہیں، لیکن میں آپ سب سے وعدہ کرتا ہوں کہ اگر آپ ہمارے امیدواروں کو جتائیں تو بی جے پی بہار کی سرزمین سے ہر درانداز کو باہر کرے گی۔‘‘

پاپولر فرنٹ آف انڈیا پر نشانہ

امت شاہ نے کہا کہ پاپولر فرنٹ آف انڈیا (PFI) بہار میں سرگرم ہو چکی ہے اور اس کا مقصد ریاست کو ’’اسلامی ریاست‘‘ بنانا ہے۔ انہوں نے کہا، ’’لالو اور راہل ووٹر لسٹ میں دراندازوں کے محافظ ہیں۔ بتائیے، کیا دراندازوں کو ہٹایا جانا چاہیے یا نہیں؟… پی ایف آئی بہار میں پنپنے لگی ہے، وہ پورے بہار کو اسلامی ریاست بنانے کی سازش کر رہے ہیں۔‘‘

’’پی ایم مودی نے پی ایف آئی پر پابندی لگا کر ملک بچایا‘‘

امت شاہ نے کہا کہ ملک بھر میں پی ایم مودی نے چھاپے مروائے اور پی ایف آئی کے ارکان کو گرفتار کیا۔ ’’پی ایم مودی نے 100 مقامات پر چھاپے مارے اور پی ایف آئی کے لوگوں کو جیل میں ڈالا۔ بیگو سرائے کے عوام بتائیں، کیا آپ ان غداروں کو جیل سے نکالنا چاہتے ہیں؟ پی ایف آئی ایک ملک مخالف تنظیم تھی، جس پر پی ایم مودی نے پابندی لگائی۔‘‘ انہوں نے مزید کہا، ’’لالو جی اب ان لوگوں کو خواب دکھا رہے ہیں کہ اگر ہم آئے تو تمہیں جیل سے چھڑا دیں گے۔ لیکن دہشت گردی اور نکسلزم کو ختم کرنے کا کام پی ایم مودی نے کیا ہے۔ بہار آج نکسل فری ہے اور 31 مارچ 2026 تک پورا ملک نکسلزم سے آزاد ہو جائے گا۔‘‘

پی ایف آئی پر پابندی کی پس منظر

یاد رہے کہ ستمبر 2022 میں وزارت داخلہ نے پاپولر فرنٹ آف انڈیا (PFI) اور اس سے منسلک تنظیموں کو غیر قانونی ایسوسی ایشن قرار دیتے ہوئے پابندی عائد کر دی تھی۔ حکومت نے اپنے فیصلے کی بنیاد پر 100 سے زائد گواہوں کے بیانات اور ویڈیو شواہد پیش کیے، جن میں پی ایف آئی کے داعش، سیمی اور جماعت المجاہدین بنگلہ دیش (JMB) سے تعلقات کا دعویٰ کیا گیا۔ اس کارروائی کے دوران 150 سے زائد افراد کو گرفتار کیا گیا تھا۔

بہار اسمبلی انتخابات: این ڈی اے اور مہاگٹھ بندھن میں سخت مقابلہ

2025 کے بہار اسمبلی انتخابات میں مقابلہ نیشنل ڈیموکریٹک الائنس (NDA) اور مہاگٹھ بندھن کے درمیان ہو رہا ہے۔ این ڈی اے میں شامل جماعتوں میں بھارتیہ جنتا پارٹی (بی جے پی)، جنتا دل (یونائیٹڈ)، لوک جن شکتی پارٹی (رام ولاس)، ہندوستانی عوام مورچہ (سیکولر) اور راشٹریہ لوک مورچہ شامل ہیں۔ دوسری جانب آر جے ڈی کی قیادت والا مہاگٹھ بندھن، کانگریس، سی پی آئی (ایم-ایل)، سی پی آئی، سی پی ایم اور مکیش سہنی کی وی آئی پی پارٹی پر مشتمل ہے۔ اس کے علاوہ پرشانت کشور کی ’جن سوراج‘ پارٹی نے بھی تمام 243 نشستوں پر امیدوار اتارنے کا اعلان کیا ہے۔

بھارت ایکسپریس اردو۔