PM Modi meets diaspora in New Zealand: نیوزی لینڈ میں بھارتی برادری سے ملاقات کے بعد وزیراعظم مودی کا اظہار تشکر، آکلینڈ میں آج وزیراعظم کرسٹوفرلکسن سے کریں گے ملاقات

آکلینڈ: وزیراعظم نریندر مودی نے اپنے تین ملکی دورے کے آخری مرحلے میں نیوزی لینڈ پہنچنے کے بعد وہاں مقیم بھارتی برادری سے ملاقات کی اور ان کے پرتپاک استقبال پر اظہارِ تشکر کرتے ہوئے کہا کہ نیوزی لینڈ میں رہنے والے بھارتیوں کا اپنے وطن سے رشتہ آج بھی مضبوط اور اٹوٹ ہے۔ وزیراعظم مودی نے سوشل میڈیا پلیٹ فارم ایکس پر اپنے پیغام میں کہا: ’’نیوزی لینڈ میں مقیم بھارتی برادری کی محبت اور خلوص نے مجھے بے حد متاثر کیا۔ انہوں نے چار دہائیوں تک کسی بھارتی وزیراعظم کے دورے کا انتظار کیا، اور آج ان کا غیر معمولی جوش و خروش اور گرمجوشی واضح طور پر نظر آئی۔ بھارت کے ساتھ ان کا تعلق آج بھی پہلے کی طرح مضبوط اور اٹوٹ ہے۔‘‘

The love and affection of the New Zealand’s Indian community touched me deeply. They have waited four decades for the visit of an Indian Prime Minister and their extraordinary enthusiasm and warmth were visible today. Their bond with India remains unwavering. pic.twitter.com/7wk2vhNAbi

— Narendra Modi (@narendramodi) July 10, 2026

 ترنگے کے رنگوں میں جگمگا اٹھا آکلینڈ کا اسکائی ٹاور

وزیراعظم مودی کی تاریخی آمد کے موقع پر آکلینڈ کے معروف اسکائی ٹاور کو بھارت کے قومی پرچم کے رنگوں سے روشن کیا گیا۔ بھارتی وزارتِ خارجہ کے ترجمان رندھیر جیسوال نے اس منظر کی تصاویر شیئر کرتے ہوئے کہا کہ یہ اقدام بھارت اور نیوزی لینڈ کے درمیان گہری دوستی اور مضبوط شراکت داری کی علامت ہے۔

مودی نے دورے کو تاریخی قرار دیا

وزیراعظم مودی نے نیوزی لینڈ پہنچنے کے فوراً بعد اپنے دورے کو تاریخی قرار دیتے ہوئے وزیراعظم کرسٹوفر لکسن کی جانب سے ہوائی اڈے پر پرتپاک استقبال پر شکریہ ادا کیا۔ انہوں نے کہا کہ وہ وزیراعظم لکسن کے ساتھ ملاقات میں بھارت اور نیوزی لینڈ کے دوطرفہ تعلقات کے تمام پہلوؤں پر تفصیلی تبادلۂ خیال کے منتظر ہیں، جبکہ آکلینڈ میں بھارتی برادری کے ایک بڑے اجتماع سے بھی خطاب کریں گے۔

تجارت، دفاع اور عوامی روابط پر خصوصی توجہ

بھارتی وزارتِ خارجہ کے مطابق وزیراعظم مودی آکلینڈ میں اپنے ہم منصب کرسٹوفر لکسن کے ساتھ دوطرفہ مذاکرات کریں گے، جن میں تجارت، سرمایہ کاری، دفاع، عوامی روابط اور دیگر شعبوں میں تعاون کا جائزہ لیا جائے گا۔ دورے کے دوران وزیراعظم مودی ممتاز کاروباری شخصیات اور کھیلوں سے وابستہ اہم شخصیات سے بھی ملاقات کریں گے۔ وزارتِ خارجہ کے مطابق دونوں ممالک کے درمیان رواں سال اپریل میں آزاد تجارتی معاہدے (FTA) پر دستخط کے بعد یہ دورہ دوطرفہ تجارت اور تعلقات کو مزید وسعت دینے میں اہم کردار ادا کرے گا۔ واضح رہے کہ وزیراعظم کرسٹوفر لکسن نے 17 مارچ 2025 کو بھارت کا سرکاری دورہ کیا تھا، جس کے دوران نئی دہلی میں دونوں رہنماؤں کے درمیان دوطرفہ ملاقات بھی ہوئی تھی۔

بھارت ایکسپریس اردو۔