PM to visit Guwahati: آسام میں بی جے پی کا سو سیٹوں کا ہدف، 14 فروری کو گوہاٹی کا دورہ کریں گے وزیراعظم مودی، امت شاہ لیں گے تیاریوں کا جائزہ

نئی دہلی: بی جے پی نے آسام اسمبلی انتخابات سے قبل 100 سیٹیں جیتنے کا بلند حوصلہ ہدف مقرر کیا ہے، جس سے ریاست میں پارٹی کی مضبوط سیاسی حکمت عملی اور جارحانہ انتخابی مہم کا عندیہ ملتا ہے۔ اسی حکمت عملی کے تحت وزیراعظم نریندر مودی 14 فروری کو گوہاٹی کا دورہ کریں گے، جہاں وہ پورے آسام سے آنے والے تقریباً ایک لاکھ بوتھ لیول کارکنان کی ایک عظیم الشان کانفرنس سے خطاب کریں گے۔ پارٹی قیادت کے مطابق یہ کانفرنس نچلی سطح پر پارٹی کو مزید مضبوط بنانے اور کارکنوں میں نیا جوش بھرنے کے لیے منعقد کی جارہی ہے۔

امت شاہ کا انتخابی تیاریوں کا لیں گے جائزہ

بی جے پی کے سینئر رہنماؤں کے مطابق مرکزی وزیر داخلہ امت شاہ 21 فروری کو آسام کا دورہ کریں گے۔ اس دوران وہ اہم تنظیمی اجلاسوں کی صدارت کریں گے، انتخابی حکمت عملی کا جائزہ لیں گے اور پارٹی رہنماؤں و کارکنان سے براہ راست گفتگو کریں گے۔ پارٹی ذرائع کا کہنا ہے کہ وزیراعظم اور وزیر داخلہ کے یہ دورے بی جے پی کی انتخابی مہم کو نئی توانائی فراہم کریں گے اور کارکنان کو واضح سیاسی سمت ملے گی۔

ترقی اور گڈ گورننس بی جے پی کی مہم کا مرکزی نعرہ

بی جے پی قیادت نے واضح کیا ہے کہ آسام میں پارٹی کی مہم کا بنیادی محور ترقی، بہتر طرز حکمرانی اور مضبوط تنظیمی رابطہ ہوگا۔ پارٹی کا مقصد ریاست کے عوام تک اپنی فلاحی اسکیموں، ترقیاتی منصوبوں اور گڈ گورننس کے ماڈل کو مؤثر طریقے سے پہنچانا ہے۔ قابل ذکر ہے کہ آسام میں رواں برس اسمبلی انتخابات ہونے جا رہے ہیں، جہاں وزیراعلیٰ ہمنتا بسوا سرما کی قیادت میں بی جے پی اپنی حکومت کو برقرار رکھنے کے لیے کوشاں ہے۔ دوسری جانب کانگریس اور دیگر اپوزیشن جماعتیں بھی ریاست میں مضبوط واپسی کی کوششوں میں مصروف ہیں۔

تعلیمی شعبے میں بڑا قدم: 67 جدید اسکولوں کا افتتاح

انتخابی ماحول کے بیچ وزیراعلیٰ ہمنتا بسوا سرما نے پیر کے روز ریاست کے تعلیمی شعبے میں ایک بڑی پیش رفت کا اعلان کرتے ہوئے 67 جدید طرز کے اسکولوں کا افتتاح کیا۔ یہ اسکول NESIDS، PM-DevINE اور RIDF-XXIX اسکیموں کے تحت تعمیر کیے گئے ہیں۔ اس کے ساتھ ہی 61 نئے اسکولوں کی تعمیر کا سنگ بنیاد بھی رکھا گیا جو RIDF-XXXI اسکیم کے تحت مختلف اضلاع میں قائم کیے جائیں گے۔

760 کروڑ روپے کی سرمایہ کاری، تعلیمی انقلاب کی جانب قدم

سرکاری اعلامیے کے مطابق ان منصوبوں پر مجموعی طور پر 760 کروڑ روپے کی سرمایہ کاری کی جا رہی ہے، جس کا مقصد طلبہ کے لیے عالمی معیار کا تعلیمی ماحول فراہم کرنا اور ہر بچے کو بڑے خواب دیکھنے اور انہیں حقیقت میں بدلنے کا موقع دینا ہے۔ اس موقع پر خطاب کرتے ہوئے وزیراعلیٰ ہمنتا بسوا سرما نے اس دن کو آسام کے تعلیمی شعبے کے لیے تاریخی اور انقلابی قرار دیا اور بتایا کہ ریاست بھر میں 1,318 اسکولوں کی نئی عمارتوں کی تعمیر کا کام جاری ہے۔

بھارت ایکسپریس اردو۔