Bihar election ban on exit polls: ایگزٹ پول پر پابندی… ووٹنگ کی بنیاد پرنہیں دکھا سکتے پیش گوئی ، الیکشن کمیشن نے جاری کی وارننگ

بہار اسمبلی انتخابات 2025 کے پیش نظر الیکشن کمیشن  آف انڈیا(ای سی آئی) نے ایک اہم نوٹیفکیشن جاری کیا ہے، جس میں ایگزٹ پول سے متعلق ضوابط کو واضح کیا گیا ہے۔ اس اقدام کا مقصد یہ ہے کہ ووٹنگ کے دوران عوامی رائے یا انتخابی نتائج پر اثر ڈالے بغیر منصفانہ اور شفاف طریقے سے انتخابات کرائے جا سکیں۔الیکشن کمیشن نے کہا ہے کہ عوامی نمائندگی ایکٹ 1951 کے تحت 6 نومبر کی صبح 7 بجے سے لے کر 11 نومبر کی شام 6:30 بجے تک کسی بھی طرح کا ایگزٹ پول کرانا یا اس کے نتائج میڈیا پر شائع کرنا مکمل طور پر ممنوع ہوگا۔اس کا مطلب یہ ہے کہ اس دوران کوئی بھی نیوز چینل، اخبار یا ویب سائٹ ووٹروں کے ووٹ ڈالنے کے رجحان کی بنیاد پر کوئی پیش گوئی یا اندازہ ظاہر نہیں کر سکتا۔ یہ ضابطہ نہ صرف بہار اسمبلی انتخابات بلکہ دیگر 7 ریاستوں میں ہونے والے 8 ضمنی انتخابات پر بھی لاگو ہوگا۔

48 گھنٹے تک اوپنین پول پر پابندی

نوٹیفکیشن میں یہ بھی کہا گیا ہے کہ ووٹنگ کے اختتام کے بعد 48 گھنٹوں تک کسی بھی اوپنین پول یا ووٹنگ سروے کے نتائج کو الیکٹرانک میڈیا پر دکھانا ممنوع ہے۔ یہ ضابطہ تمام میڈیا اداروں اور ڈیجیٹل پلیٹ فارمز پر یکساں طور پر نافذ ہوگا۔سادہ الفاظ میں کہا جائے تو انتخابات کے دوران اور ووٹنگ ختم ہونے کے بعد 48 گھنٹے تک کوئی بھی چینل، اخبار یا سوشل میڈیا پلیٹ فارم ووٹروں کے رجحان پر مبنی نتائج دکھانے یا پھیلانے کا کام نہیں کر سکتا۔ الیکشن کمیشن کا کہنا ہے کہ انتخاب سے پہلے یا دوران کسی بھی قسم کی پیش گوئی یا نتیجے کی تشہیر ووٹروں کی رائے کو متاثر کر سکتی ہے، اسی لیے اس پر سخت پابندی عائد کی گئی ہے۔الیکشن کمیشن کے اس نوٹیفکیشن کا مقصد یہ یقینی بنانا ہے کہ ووٹر آزادانہ اور غیرجانبدار طریقے سے اپنا ووٹ دے سکیں۔ اسی بنا پر تمام میڈیا اداروں کے لیے ان اصولوں کی پابندی لازمی قرار دی گئی ہے۔

بھارت ایکسپریس اردو۔