Bihar election 2025: پہلے مرحلے میں 64.46 فیصد ووٹنگ، بیگوسرائے سب سے آگے، شیخپورہ سب سے پیچھے

بہار اسمبلی انتخابات کے پہلے مرحلے میں جمعرات کو اندازاً 64.46 فیصد ووٹنگ ہوئی۔ پولنگ کا مقررہ وقت شام 5 بجے ختم ہو گیا، تاہم جو ووٹر اس مقررہ وقت سے پہلے قطار میں کھڑے ہو گئے تھے، انہیں ووٹ ڈالنے کی اجازت دی جائے گی۔صبح سے ہی کثیر تعداد میں خواتین ووٹروں کو اپنے حق رائے دہی کے استعمال کے لیے قطاروں میں کھڑے دیکھا گیا۔ حالیہ برسوں میں بہار نے مردوں کے مقابلے خواتین کی زیادہ انتخابی شمولیت کا اعزاز حاصل کیا ہے۔ جن اضلاع میں سب سے زیادہ ووٹنگ ریکارڈ کی گئی، ان میں بیگوسرائے 67.32 فیصد، سمستی پور 66.65 فیصد، مدھے پورہ 65.74 فیصد اور مظفرپور 65.23 فیصد کے ساتھ شامل ہیں۔اس کے برعکس شیخپورہ میں سب سے کم، یعنی 52.36 فیصد ووٹنگ ہوئی، جبکہ بھوجپور میں 53.24 فیصد ووٹنگ درج کی گئی۔ ریاستی دارالحکومت پٹنہ میں تقریباً 55.02 فیصد ووٹنگ ہونے کا اندازہ ہے، جو حتمی اعداد و شمار جاری ہونے کے بعد بڑھ سکتی ہے۔

چند مقامات پر تشدد کے واقعات

بہار کی 243 اسمبلی نشستوں میں سے 121 پر پہلے مرحلے میں ووٹنگ ہوئی، جبکہ باقی 122 سیٹوں پر ووٹنگ دوسرے مرحلے میں 11 نومبر کو ہوگی۔ نتائج 14 نومبر کو جاری کیے جائیں گے۔ پولنگ کے دوران کہیں کہیں تشدد کی خبریں بھی سامنے آئیں۔ لکھی سرائے میں نائب وزیر اعلیٰ وجے کمار سنہا کے قافلے پر حملے اور چھپرا میں مبینہ طور پر سی پی آئی امیدوار کی گاڑی پر حملے کی اطلاع ملی۔ چھپرا سے موصولہ اطلاعات کے مطابق مانجھی سیٹ سے امیدوار ستیندر یادو کے قافلے پر دوپہر کے وقت حملہ کیا گیا۔ اسی طرح لکھی سرائے میں بی جے پی امیدوار وجے کمار سنہا کے قافلے پر پتھر اور چپل پھینکے گئے، جس کے بعد حالات کشیدہ ہو گئے۔ بھیڑ نے انہیں گھیر کر مردہ باد کے نعرے لگائے اور آگے بڑھنے سے روک دیا۔ الیکشن کمیشن نے اس واقعے پر سخت نوٹس لیتے ہوئے بہار کے ڈی جی پی ونئے کمار کو کارروائی کرنے کی ہدایت دی ہے۔

سیاسی مقابلہ اور نئی سیاسی قوت کا اثر

ریاست میں اصل مقابلہ جنتا دل (یونائیٹڈ) کے لیڈر اور وزیر اعلیٰ نتیش کمار کی قیادت والے این ڈی اے اتحاد اور راشٹریہ جنتا دل کے لیڈر تیجسوی یادو کی قیادت والے عظیم اتحاد کے درمیان ہے۔ اس بار پرشانت کشور کی جانب سے قائم کی گئی جن سوراج پارٹی (جے ایس پی) کی موجودگی بعض نشستوں پر نتائج کو متاثر کر سکتی ہے اور سیاسی مساوات میں تبدیلی لا سکتی ہے۔ دوسری جانب آر جے ڈی نے الزام لگایا ہے کہ انتظامیہ عظیم اتحاد کے مضبوط علاقوں میں جان بوجھ کر بجلی منقطع کروا رہی ہے تاکہ ووٹنگ سست ہو سکے۔ پہلے مرحلے کے نمایاں امیدواروں میں عظیم اتحاد کے وزیر اعلیٰ کے امیدوار تیجسوی یادو، بی جے پی کے دو موجودہ نائب وزیر اعلیٰ سمراٹ چودھری اور وجے کمار سنہا، جے ڈی یو کے ریاستی صدر اومیش کُشواہا، اور آر جے ڈی کے بھولا یادو شامل ہیں جو لالو پرساد یادو کے قریبی ساتھی سمجھے جاتے ہیں۔

بھارت ایکسپریس اردو۔