Bihar Elections 2025: مسلم امیدواروں کو ٹکٹ دینے میں سیاسی جماعتوں کی کنجوسی، سیمانچل کی بڑی آبادی بھی نظرانداز

پٹنہ: بہار اسمبلی انتخابات کے پہلے مرحلے کے لیے نامزدگی کا عمل مکمل ہو چکا ہے، لیکن امیدواروں کی فہرست میں مسلم چہروں کی تعداد انتہائی کم ہے۔ ریاست کی کل آبادی میں مسلمانوں کا حصہ تقریباً 17.7 فیصد ہے، جبکہ سیمانچل کے اضلاع میں یہ تناسب 40 فیصد سے بھی زیادہ ہے۔ اس کے باوجود بڑی سیاسی جماعتوں نے مسلم امیدواروں کو ٹکٹ دینے میں کافی کنجوسی دکھائی ہے۔

کتنے مسلم امیدواروں کو ملا ٹکٹ؟
243 اسمبلی نشستوں میں سے کسی بھی بڑی پارٹی نے اب تک 4 سے زیادہ مسلم امیدواروں کو ٹکٹ نہیں دیا ہے۔ استثناء کے طور پر پرشانت کشور کی جن سوراج پارٹی نے 40 مسلم امیدواروں کو میدان میں اتارنے کا وعدہ کیا ہے اور اب تک 21 ناموں کا اعلان کر چکی ہے۔

کہاں کتنی ہے مسلم آبادی؟
بہار کے 87 انتخابی حلقوں میں مسلمانوں کی آبادی 20 فیصد سے زیادہ ہے، جو انہیں انتخابی نتائج میں فیصلہ کن حیثیت دیتی ہے۔ خاص طور پر سیمانچل کے کٹیہار، پورنیہ، ارریہ اور کشن گنج جیسے اضلاع میں مسلم آبادی 40 فیصد سے اوپر ہے۔ کشن گنج میں تو مسلمان اکثریت میں ہیں جہاں ان کی آبادی 68 فیصد ہے۔

سیاسی جماعتوں کا حال
حکمران جنتا دل (یونائیٹڈ) — JDU — اس بار 101 نشستوں پر الیکشن لڑ رہی ہے، مگر اس نے صرف 4 مسلم امیدواروں کو ٹکٹ دیا ہے۔ حزبِ اختلاف آر جے ڈی (RJD) نے اب تک 3 مسلم امیدواروں کا اعلان کیا ہے، جن میں اوسامہ صاحب، یوسف صلاح الدین اور محمد اسرائیل منصوری شامل ہیں۔

بی جے پی (BJP) نے جن 101 نشستوں پر امیدوار اتارنے کا اعلان کیا ہے، ان میں ایک بھی مسلم امیدوار شامل نہیں ہے۔ کانگریس نے 4 مسلم امیدواروں کے نام دیے ہیں۔ حالانکہ پارٹی کے اندر سے سوال اٹھ رہے ہیں کہ راہل گاندھی کا اصول یہاں کیوں لاگو نہیں ہو رہا۔

ایل جے پی (رام ولاس پاسوان گروپ) نے 29 نشستوں پر الیکشن لڑنے کا اعلان کیا ہے، جن میں صرف ایک مسلم امیدوار محمد کلیم الدین کو بہادرگنج سے ٹکٹ دیا گیا ہے۔ این ڈی اے کے دیگر اتحادی — ہندوستانی عوام مورچہ (HAM) اور راشٹریہ لوک مورچہ — نے کسی مسلمان کو ٹکٹ نہیں دیا۔

تاریخی طور پر بھی کم نمائندگی
اسمبلی میں مسلم اراکین کی تعداد کبھی بھی 10 فیصد سے زیادہ نہیں رہی، سوائے 1985 کے جب بہار غیر منقسم تھا۔ اُس وقت 324 رکنی اسمبلی میں 34 مسلم اراکین منتخب ہوئے تھے۔ 2020 کے الیکشن میں صرف 19 مسلم امیدوار کامیاب ہو سکے۔

ریاست کے 2.3 کروڑ مسلمانوں میں سے تقریباً 73 فیصد پسماندہ طبقے سے تعلق رکھتے ہیں، لیکن اب تک صرف 18 فیصد مسلم ایم ایل اے پسماندہ طبقے سے آئے ہیں۔ 2020 میں صرف 5 پسماندا مسلم امیدوار جیت پائے تھے، جن میں 4 اے آئی ایم آئی ایم (AIMIM) سے اور ایک آر جے ڈی سے تھا۔

پچھلے انتخابات کا جائزہ
2020 میں JDU نے 11 مسلم امیدوار اتارے، مگر سب ہار گئے۔ RJD نے 17 میں سے 8 مسلم امیدواروں کو جتوایا۔ کانگریس کے 10 میں سے 4 اور AIMIM کے 20 میں سے 5 امیدوار کامیاب ہوئے۔ بعد میں AIMIM کے 4 ارکان RJD میں شامل ہو گئے اور BSP کا واحد مسلم رکن JDU میں چلا گیا۔

سیاسی مساوات اور ووٹ بینک
لالو پرساد یادو کا ’ایم وائے‘ (مسلم-یادو) ووٹ بینک کبھی جیت کی ضمانت سمجھا جاتا تھا، مگر نتیش کمار نے انتہائی پسماندہ طبقات کو جوڑ کر نیا سماجی و سیاسی توازن بنا لیا، جس سے گزشتہ دو دہائیوں میں اقتدار کا نقشہ بدل گیا۔

پھر وہی سوال — مسلمانوں کی نمائندگی کہاں؟
بہار الیکشن 2025 میں ایک بار پھر مسلم نمائندگی زیرِ بحث ہے۔ سیمانچل کی بڑی مسلم آبادی، تاریخی نظراندازی اور سیاسی جماعتوں کی محدود حکمتِ عملی نے مسلم ووٹروں کو یہ سوچنے پر مجبور کر دیا ہے کہ کیا ان کی آواز واقعی اسمبلی تک پہنچ پائے گی؟

بھارت ایکسپریس۔