Mateen Ahmed Joins AAP: دہلی میں کانگریس کو بڑا جھٹکا، 5 بار کے ایم ایل اے متین احمد AAP میں شامل

Mateen Ahmed Joins AAP: دہلی میں اسمبلی انتخابات سے پہلے کانگریس کو بڑا جھٹکا لگا ہے۔ دہلی سے پانچ بار کانگریس کے ایم ایل اے متین احمد نے اتوار (10 نومبر) کو عام آدمی پارٹی (اے اے پی) میں شمولیت اختیار کی۔ متین احمد کانگریس کے سینئر لیڈر ہیں۔ دہلی انتخابات سے قبل متین احمد کی عآپ میں شمولیت کو کانگریس کے لئے بڑا نقصان مانا جا رہا ہے۔

عام آدمی پارٹی کے قومی کنوینر اور دہلی کے سابق وزیر اعلی اروند کیجریوال متین کے گھر گئے اور انہیں پارٹی میں شامل کیا۔ اس دوران دہلی حکومت کے وزیر عمران حسین بھی موجود رہے۔ اروند کیجریوال خود متین کے گھر پہنچے۔ اس سے یہ واضح ہو گیا کہ آئندہ اسمبلی کا ٹکٹ ان کے خاندان کے لیے کنفرم ہو گیا ہے۔

ان علاقوں میں مضبوط ہے متین احمد کی گرفت

متین احمد 1993 سے 2015 کے درمیان پانچ بار سیلم پور اسمبلی حلقہ سے ایم ایل اے رہ چکے ہیں۔ وہ دہلی جل بورڈ کے سابق وائس چیئرمین بھی رہ چکے ہیں۔ جب شیلا دکشت وزیر اعلیٰ تھیں تو انہیں دہلی وقف بورڈ کا چیئرمین بھی بنایا گیا تھا۔ دہلی میں مسلم ووٹروں کے اثر و رسوخ والے تقریباً دس اسمبلی حلقوں میں ان کی گرفت اچھی سمجھی جاتی ہے۔

دیوالی کے موقع پر متین احمد کے بیٹے چودھری زبیر اور کانگریس کے بابر پور ضلع صدر اور چوہان بنگر سے کانگریس کونسلر شگفتہ چودھری نے عام آدمی پارٹی میں شمولیت اختیار کی تھی۔ دہلی کی کل 70 اسمبلی سیٹوں پر فروری 2025 میں اسمبلی انتخابات ہونے ہیں۔

یہ بھی پڑھیں- Maharashtra Election 2024: ‘کیا کوئی کانگریسی بالا صاحب کے اعزازمیں کہ سکتا ہے چند الفاظ ؟’ ادھو کو نشانہ بناتے ہوئے امت شاہ نے کہی یہ بات

کون ہیں متین احمد؟

متین احمد پہلی بار جنتا دل کے ٹکٹ پر 1993 میں دہلی کے سیلم پور حلقہ سے ایم ایل اے منتخب ہوئے تھے۔ انہوں نے بی جے پی کے جئے کشن داس گپتا کو 1438 ووٹوں سے شکست دی۔ 1996 میں وہ جنتا دل چھوڑ کر کانگریس پارٹی میں شامل ہو گئے۔ 1998 کے دہلی اسمبلی انتخابات کے دوران کانگریس نے انہیں ٹکٹ دینے سے انکار کر دیا تھا۔ انہوں نے آزاد امیدوار کے طور پر الیکشن لڑا اور بی جے پی کو 16,375 ووٹوں سے شکست دی۔ سال 2003 اور 2008 کے اسمبلی انتخابات میں وہ کانگریس کے ٹکٹ پر تیسری اور چوتھی بار دہلی اسمبلی کے لیے منتخب ہوئے۔

-بھارت ایکسپریس