Acharya Pramod Krishanam statement: بنگلہ دیش میں اقلیتوں پر ہو رہے حملوں پر آچاریہ پرمود کرشنم کا بیان — کہا، سناتن ایک اٹل حقیقت ہے، انتہاپسند اسے مٹا نہیں سکتے

بنگلہ دیش میں انتہاپسند عناصر کے ہاتھوں اقلیتوں پر ہو رہے حملوں پر کلکی دھام کے پیٹھادھیشور آچاریہ پرمود کرشنم نے گہرے دکھ اور افسوس کا اظہار کیا ہے۔ انہوں نے حملوں میں جاں بحق ہونے والے اقلیتی نوجوان کو خراج  عقیدت پیش کرتے ہوئے کہا کہ سناتن کو مٹانے والے خود مٹ گئے، مگر سناتن آج بھی زندہ ہے۔ چند روز قبل بنگلہ دیش میں اقلیتی  نوجوان کو مبینہ طور پر توہین مذہب کے الزام میں انتہاپسندوں نے بے رحمی سے تشدد کا نشانہ بنا کر قتل کر دیا تھا۔

ہجومی تشدد سے آچاریہ پرمود کرشنم سخت ناراض

اطلاعات کے مطابق، بنگلہ دیشی ہجوم نے اقلیتی طبقے سے تعلق رکھنے والے ایک نوجوان کو مذہب کی توہین کا الزام عائد کرتے ہوئے پہلے اسے شدید مارا پیٹا، پھر درخت سے لٹکا کر زندہ جلا دیا۔ اس واقعے پر شدید ناراضگی کا اظہار کرتے ہوئے آچاریہ پرمود کرشنم نے سوشل میڈیا پر ایک پوسٹ کی۔ انہوں نے لکھا کہ سناتن دھرم کو مٹانے کے لیے ہزار سال تک ہندوؤں پر مظالم ڈھائے گئے، مگر مٹانے والے خود مٹ گئے اور سناتن آج بھی ابدی اور سچ ہے۔ اپنی پوسٹ میں آچاریہ پرمود کرشنم نے بنگلہ دیش کی عبوری حکومت کے چیف ایڈوائزر محمد یونس کو بھی ٹیگ کیا۔ بنگلہ دیش میں ہونے والے تشدد کے خلاف بھارت میں بھی زبردست احتجاج دیکھنے میں آیا۔ بجرنگ دل سے لے کر وشو ہندو پریشد جیسی تنظیموں نے ملک بھر میں مظاہرے کرتے ہوئے حکومتِ ہند سے مطالبہ کیا کہ بنگلہ دیش کے خلاف سخت سے سخت کارروائی کی جائے۔

بھارت نے سخت ناراضگی کا اظہار کیا

بھارت کے پڑوس میں اقلیتوں پر ہونے والے مظالم پر بھارت نے شدید ناراضگی ظاہر کی ہے۔ وزارتِ خارجہ کے ترجمان رندھیر جیسوال نے کہا کہ بھارت بنگلہ دیش میں اقلیتوں پر ہو رہے مظالم کی سخت مذمت کرتا ہے۔

سابق سفارتکار کی وارننگ

پڑوسی ملک میں اقلیتوں پر بڑھتے مظالم کے حوالے سے سابق بھارتی سفارتکار سریش کے گوئل نے بھی محمد یونس کو خبردار کیا ہے۔ انہوں نے کہا کہ بنگلہ دیش میں جو بظاہر امن نظر آ رہا ہے، وہ دراصل طوفان سے پہلے کی خاموشی ہے۔ ان کے مطابق محمد یونس کے فیصلے جہادی فکر رکھنے والی شخصیات سے حد سے زیادہ متاثر ہو رہے ہیں۔انہوں نے مزید کہا کہ بنگلہ دیش میں حالات ابھی مزید خراب ہونے والے ہیں اور جو کچھ ہم اس وقت دیکھ رہے ہیں، اس سے کہیں زیادہ پیچیدہ مسائل سامنے آ سکتے ہیں۔

بھارت ایکسپریس اردو۔