Assam Assembly Elections: آسام میں بی جے پی کی ہیٹ ٹرک، ہیمنت بسوا سرما کی حکمت عملی کامیاب، مسلسل تیسری بار حکومت بنانے کے قریب

گواہاٹی/نئی دہلی: آسام اسمبلی انتخابات 2026 کے نتائج نے ایک بار پھر یہ واضح کر دیا ہے کہ شمال مشرقی سیاست میں اصل طاقت ہمینت بسوا سرما کے ہاتھ میں ہے۔ بھارتیہ جنتا پارٹی ریاست میں مسلسل تیسری بار حکومت بنانے کی طرف بڑھ رہی ہے، جس نے سیاسی مبصرین کو حیران کر دیا ہے۔ اس کامیابی کے پیچھے دو اصطلاحات نمایاں رہیں ’ماما‘ اور ’میاں‘ جنہوں نے انتخابی بیانیہ اور ووٹنگ پیٹرن دونوں کو گہرے طور پر متاثر کیا۔

’ماما‘ برانڈنگ: خواتین ووٹ بینک پر مضبوط گرفت

آسام میں ہمینت بسوا سرما نے خود کو صرف ایک وزیراعلیٰ کے طور پر نہیں بلکہ ’ماما‘ (ماموں) کے طور پر پیش کیا، جس نے ایک جذباتی رشتہ قائم کیا۔ ’ارونودوئی 2.0‘ جیسی اسکیموں کے تحت خواتین کے بینک کھاتوں میں براہ راست مالی مدد پہنچائی گئی، جس سے ایک مضبوط اور وفادار خواتین ووٹ بینک تیار ہوا۔ دیہی علاقوں میں یہ اسکیمیں مہنگائی جیسے مسائل پر حاوی ہو گئیں اور خواتین نے بڑی تعداد میں بی جے پی کے حق میں ووٹ دیا۔

’میاں‘ سیاست اور مسلم مخالف بیانیہ

دوسری جانب ’میاں‘ سیاست کو ایک جارحانہ انتخابی ہتھیار کے طور پر استعمال کیا گیا۔ بنگلہ دیشی دراندازی اور آبادیاتی تبدیلی جیسے حساس مسائل کو اٹھاتے ہوئے ہمینت بسوا سرما نے خود کو مقامی شناخت کے محافظ کے طور پر پیش کیا۔ مدارس کی بندش، زمین سے متعلق سخت پالیسیوں اور ثقافتی تحفظ کے بیانیے نے ہندو اور مقامی آسامیہ ووٹروں کو ایک پلیٹ فارم پر لا کھڑا کیا، جس سے زبردست پولرائزیشن دیکھنے کو ملی۔

ترقیاتی ماڈل: کارکردگی کا عنصر

صرف جذباتی اور شناختی سیاست ہی نہیں بلکہ ترقیاتی کام بھی اس کامیابی کا اہم ستون رہے۔ سڑکوں، میڈیکل کالجوں اور شفاف بھرتیوں جیسے اقدامات نے ہمینت بسوا سرما کو ایک فعال  رہنما کے طور پر پیش کیا۔ ان کی ورکنگ اسٹائل نے عوام میں اعتماد پیدا کیا کہ حکومت کام کر رہی ہے، جس سے کسی بڑی اینٹی انکمبنسی لہر کو جنم نہیں لینے دیا۔

کانگریس کی کمزور حکمت عملی

انڈین نیشنل کانگریس اس انتخاب میں مؤثر چیلنج پیش کرنے میں ناکام رہی۔ پارٹی کے اہم چہرے گورو گوگوئی عوامی سطح پر وہ اثر قائم نہ کر سکے جو ہمینت بسوا سرما کا تھا۔ انتخابی مہم کے دوران بیاناتی تنازعات اور حکمت عملی کی کمزوری نے بھی کانگریس کو نقصان پہنچایا، جبکہ اقلیتی ووٹوں کی تقسیم نے بی جے پی کے حق میں فضا مزید سازگار بنا دی۔

’ہیمنت دور‘ کی مضبوط بنیاد

2026 کے نتائج نے یہ ثابت کر دیا ہے کہ ہمینت بسوا سرما نے ’ترقی + شناخت + جذباتی رابطہ‘ کا ایک ایسا سیاسی فارمولہ تیار کیا ہے جو فی الحال ناقابل شکست دکھائی دیتا ہے۔ آسام میں بی جے پی کی ممکنہ ہیٹ ٹرک صرف مرکزی قیادت کا اثر نہیں بلکہ ایک ایسے مقامی ماڈل کی کامیابی ہے جس نے ہر گھر تک اپنی رسائی بنائی ہے اور ریاست کی سیاست میں ایک نئے دور کی بنیاد رکھ دی ہے۔

بھارت ایکسپریس اردو۔