Ashwini Vaishnaw lauds GST reform: ’’بیس لاکھ کروڑ روپے جی ڈی پی میں اضافہ ممکن، یہ اصلاحات ڈیڑھ سال کی تیاری کا نتیجہ ہیں ان پر کسی بیرونی عنصر کا کوئی اثر نہیں‘‘— اشونی ویشنو کا جی ایس ٹی اصلاحات پرردعمل

نئی دہلی: مرکزی وزیر اور بی جے پی رہنما اشونی ویشنو نے کہا ہے کہ حالیہ جی ایس ٹی (Goods and Services Tax) اصلاحات بھارت کی معیشت کو 20 لاکھ کروڑ روپے تک کا اضافہ دے سکتی ہیں۔ انہوں نے واضح کیا کہ یہ اصلاحات ڈیڑھ سال کی تیاری کا نتیجہ ہیں اور ان پر کسی بیرونی عنصر، جیسے امریکی ٹیرف، کا کوئی اثر نہیں۔

جی ایس ٹی کونسل کی بڑی رعایتیں — ’’دیوالی کا تحفہ‘‘

وزیر نے بی جے پی ہیڈکوارٹر میں پریس کانفرنس کے دوران بتایا کہ جی ایس ٹی کونسل نے مختلف شعبوں میں شرحِ ٹیکس میں نمایاں کمی کی منظوری دی ہے، جسے حکومت نے ’’دیوالی کا تحفہ‘‘ قرار دیا ہے۔ ویشنو نے پرانے دور کی مثال دیتے ہوئے کہا: ’’پہلے ریاستی سرحدوں پر ٹرکوں کی لمبی قطاریں لگتی تھیں، اب ای وے بل سیکنڈز میں بن جاتا ہے۔‘‘ جی ایس ٹی کا نفاذ 2017 میں ہوا تھا اور اب یہ اصلاحات ٹیکس نظام کو مزید آسان اور یکساں بنانے کی سمت میں ایک اہم قدم ہیں۔

2025-26 بجٹ میں انکم ٹیکس ریلیف بھی معیشت کو سہارا دے گا

اشونی ویشنو نے کہا کہ بجٹ میں دی گئی انکم ٹیکس میں رعایت اور جی ایس ٹی ریٹ میں کمی، دونوں مل کر بھارت کی معیشت کو نئی بلندیوں تک لے جائیں گے۔ ’’2014 سے پہلے ٹیکس کا نظام پیچیدہ تھا اور ایک ہی چیز پر کئی سطحوں پر ٹیکس لگتا تھا۔ اب نظام سادہ اور یکساں ہو گیا ہے۔‘‘ انہوں نے بتایا کہ روزمرہ استعمال کی تمام اشیاء پر جی ایس ٹی میں کمی کی گئی ہے اور وزیر اعظم مودی کا لال قلعے سے کیا گیا وعدہ پورا ہوا ہے۔

معاشی اثرات — 20 لاکھ کروڑ روپے اضافی کھپت ممکن

وزیرموصوف  نے تجزیہ پیش کرتے ہوئے کہا: ’’ہمارا موجودہ جی ڈی پی 3.30 لاکھ کروڑ روپے ہے، جس میں سے 2.02 لاکھ کروڑ روپے کھپت ہے۔ اگر کھپت میں 10 فیصد اضافہ ہو تو 20 لاکھ کروڑ روپے کا اضافہ ہوگا، جو جی ڈی پی میں شامل ہوگا۔‘‘ یہ تبدیلیاں 22 ستمبر، پہلے نوی راتری کے دن سے نافذ ہوں گی۔

بھارت ایکسپریس اردو۔