Prateek Yadav passes away: ملائم سنگھ یادو کے خاندان میں غم کی لہر، اپرنا یادو کے شوہر پرتیک یادو کا انتقال، موت کی وجہ ہارٹ اٹیک یا برین ہیمریج؟

لکھنؤ: اتر پردیش کے معروف سیاسی خاندان سے تعلق رکھنے والے ملائم سنگھ یادو کے چھوٹے بیٹے اور اپرنا یادو کے شوہر پرتیک یادو کا انتقال ہو گیا ہے۔ اچانک طبیعت خراب ہونے کے بعد انہیں سول اسپتال لکھنؤ میں داخل کرایا گیا تھا، جہاں ڈاکٹروں نے انہیں مردہ قرار دے دیا۔ ابتدائی اطلاعات کے مطابق موت کی وجہ ہارٹ اٹیک یا برین ہیمریج بتائی جا رہی ہے، تاہم اصل سبب جاننے کے لیے پوسٹ مارٹم کرایا جائے گا۔

بے ہوشی کی حالت میں اسپتال لایا گیا

ڈاکٹروں کے مطابق 38 سالہ پرتیک یادو کو بے ہوشی کی حالت میں اسپتال لایا گیا تھا۔ اسپتال پہنچتے ہی ڈاکٹروں نے انہیں مردہ قرار دے دیا۔ خاندانی ذرائع کے مطابق وہ گزشتہ چند دنوں سے علیل تھے اور کچھ روز قبل بھی انہیں شدید طبیعت خراب ہونے پر لکھنؤ کے ایک اسپتال میں داخل کرایا گیا تھا۔ تین دن علاج کے بعد طبیعت میں کچھ بہتری آنے پر وہ گھر واپس آ گئے تھے۔

پوسٹ مارٹم کے لیے خصوصی پینل تشکیل

بدھ کی صبح اچانک طبیعت زیادہ بگڑنے پر انہیں صبح تقریباً چھ بجے سول اسپتال لکھنؤ لایا گیا، جہاں ان کی موت کی تصدیق کی گئی۔ اس کے بعد ان کی لاش ایمبولینس کے ذریعے پوسٹ مارٹم ہاؤس منتقل کر دی گئی۔ اطلاعات کے مطابق پوسٹ مارٹم کے لیے چار ڈاکٹروں پر مشتمل خصوصی پینل تشکیل دیا گیا ہے اور پورے عمل کی ویڈیوگرافی بھی کرائی جائے گی۔

کاروبار اور فٹنس شعبے سے تھے وابستہ

پرتیک یادو، ملائم سنگھ یادو کی دوسری اہلیہ سادھنا گپتا کے بیٹے تھے۔ ان کی اہلیہ اپرنا یادو اس وقت اتر پردیش ریاستی خواتین کمیشن کی نائب صدر ہیں اور سرگرم سیاست میں شامل ہیں۔ پرتیک یادو اگرچہ عملی سیاست سے دور رہے، لیکن وہ رئیل اسٹیٹ اور فٹنس کے کاروبار سے وابستہ تھے۔ لکھنؤ میں ان کا جم ’’دی فٹنس پلانٹ‘‘ کافی معروف تھا۔

سماجوادی پارٹی اور یوگی آدتیہ ناتھ کا اظہار افسوس

سماجوادی پارٹی نے سوشل میڈیا پلیٹ فارم ایکس پر پوسٹ کرتے ہوئے پرتیک یادو کے انتقال پر افسوس کا اظہار کیا۔ پارٹی نے اپنے پیغام میں کہا: ’’پرتیک یادو کا انتقال انتہائی افسوسناک ہے، خدا مرحوم کی روح کو سکون عطا کرے۔‘‘

اتر پردیش کے وزیراعلیٰ یوگی آدتیہ ناتھ نے بھی ان کے انتقال پر گہرے رنج و غم کا اظہار کیا۔ انہوں نے اپنے تعزیتی پیغام میں کہا کہ ’’اتر پردیش کے سابق وزیراعلیٰ اور پدم وبھوشن آنجہانی ملائم سنگھ یادو کے فرزند اور اترپردیش ریاستی خواتین کمیشن کی نائب صدر اپرنا یادو کے شوہر پرتیک یادو کا اچانک انتقال انتہائی دل دہلا دینے والا ہے۔ سوگوار خاندان کے لیے میری جانب سے تعزیت ہے۔‘‘

2011 میں ہوئی تھی اپرنا اور پرتیک کی شادی

اپرنا یادو اور پرتیک یادو کی دوستی اسکول کے زمانے میں ہوئی تھی، جو بعد میں محبت میں تبدیل ہو گئی۔ دونوں نے دسمبر 2011 میں شادی کی تھی۔ پرتیک یادو نے لیڈز یونیورسٹی لندن سے ایم بی اے کی ڈگری حاصل کی تھی۔ حال ہی میں اپرنا اور پرتیک کے درمیان طلاق کی خبروں کے باعث بھی وہ سرخیوں میں رہے تھے، تاہم بعد میں دونوں کے تعلقات بہتر ہونے کی اطلاعات سامنے آئی تھیں۔

بھارت ایکسپریس اردو۔