ED Issues Lookout Notice Against Anil Ambani: انل امبانی کی مشکلات میں مزید اضافہ، انفورسمنٹ ڈائریکٹوریٹ نے جاری کیا ’’لُک آؤٹ‘‘ نوٹس

ریلائنس گروپ کے چیئرمین انل امبانی کے لیے مشکلات میں لگاتار اضافہ ہوتا جا رہا ہے۔ ذرائع کے مطابق انفورسمنٹ ڈائریکٹوریٹ (ای ڈی) نے ان کے خلاف مبینہ 3000 کروڑ روپے کے قرض گھپلے کے سلسلے میں ’’لُک آؤٹ‘‘ سرکلر جاری کر دیا ہے۔ واضح رہے کہ ای ڈی نے امبانی کو آئندہ منگل کے روز تفتیش کے لیے بھی طلب کیا ہے۔ ’’لُک آؤٹ‘‘ سرکلر کا مقصد کسی بھی فرد کو ملک چھوڑنے سے روکنا ہوتا ہے، تاکہ وہ قانونی کارروائی سے بچ نہ پائے۔ یہ نوٹس ملک کے تمام ہوائی اڈوں اور بندرگاہوں کو بھیجا جاتا ہے تاکہ متعلقہ فرد کے ملک سے باہر جانے کی کوشش پر اسے روکا جا سکے۔

واضح رہے کہ ای ڈی انل امبانی کی ریلائنس گروپ کی کمپنیوں کو سال 2017 سے 2019 کے درمیان دیے گئے 3000 کروڑ روپے کے Yes Bank قرض میں مبینہ بدعنوانی کی تفتیش کر رہا ہے۔ تحقیقات میں انکشاف ہوا ہے کہ قرض منظور ہونے سے قبل Yes Bank کے پروموٹرز کو کچھ ادائیگیاں کی گئیں، جو مبینہ طور پر لین دین کے عوض رشوت کا معاملہ ظاہر کرتی ہیں۔ دریں اثنا ای ڈی نے 24 جولائی کو اس کیس سے جڑی 50 سے زائد کمپنیوں پر چھاپے مارے، جو کم از کم تین دن تک جاری رہے۔ یہ کارروائیاں منی لانڈرنگ کی روک تھام کے قانون (PMLA) کے تحت کی گئیں۔

اس کے ردعمل میں ریلائنس پاور اور ریلائنس انفراسٹرکچر نے اسٹاک ایکسچینجز کو بتایا کہ ای ڈی کی کارروائیوں کا ان کی کاروباری سرگرمیوں، مالی حالت یا شیئر ہولڈرز پر کوئی اثر نہیں پڑا۔ انھوں نے کہا کہ میڈیا میں چلنے والی رپورٹس دراصل 10 سال پرانی لین دین سے متعلق ہیں، جو ریلائنس کمیونیکیشنز اور ریلائنس ہوم فنانس کے معاملات سے جڑی ہیں۔

بھارت ایکسپریس اردو