PM Modi 12 Year Governance: وزیر اعظم مودی کے 12 سال: چندرا بابو نائیڈو نے کہا- ’’صحیح وقت پر صحیح لیڈر، سنہری دور کی طرف گامزن ہے بھارت‘‘

نئی دہلی: وزیر اعظم نریندر مودی کی قیادت میں مرکز کی حکومت کے 12 سال مکمل ہونے کے موقع پر آندھرا پردیش کے وزیر اعلیٰ چندرابابو نائیڈو نے ان کی قیادت اور کارکردگی کی بھرپور ستائش کرتے ہوئے کہا ہے کہ مودی بھارت کے لیے ’’صحیح وقت پر صحیح لیڈر‘‘ ثابت ہوئے ہیں اور ان کا دور ملک کے لیے ایک نئے سنہری عہد کا آغاز ہے۔ پیر کو مودی حکومت کے 12 سال مکمل ہونے کے موقع پر جاری اپنے تفصیلی مضمون میں چندرابابو نائیڈو نے کہا کہ گزشتہ بارہ برسوں میں وزیر اعظم مودی نے نہ صرف ملک کی سیاسی اور معاشی سمت کو مضبوط بنایا بلکہ بھارت کے ثقافتی وقار اور عالمی شناخت کو بھی نئی بلندیوں تک پہنچایا ہے۔ ان کے مطابق وقت گزرنے کے ساتھ یہ یقین مزید مستحکم ہوا ہے کہ مودی کی قیادت بھارت کے لیے ایک فیصلہ کن موڑ ثابت ہوئی ہے۔

واضح رہے کہ 9 جون 2024 کو نریندر مودی نے مسلسل تیسری مرتبہ بھارت کے وزیر اعظم کے طور پر حلف لیا تھا۔ اس طرح ان کے مسلسل اقتدار کے 4398 دن مکمل ہو چکے ہیں، جبکہ 10 جون کو یہ تعداد 4399 دن تک پہنچ جائے گی۔ اس کے ساتھ ہی مودی مسلسل سب سے طویل عرصے تک وزیر اعظم رہنے والے لیڈر بن گئے ہیں۔ انہوں نے ملک کے پہلے وزیر اعظم پنڈت جواہر لال نہرو کا ریکارڈ بھی پیچھے چھوڑ دیا ہے، جو مسلسل 4397 دن تک اس منصب پر فائز رہے تھے۔ اپنے مضمون میں نائیڈو نے لکھا کہ مودی کی مسلسل عوامی مقبولیت اس بات کا ثبوت ہے کہ کروڑوں بھارتی شہری ان کے طرز حکمرانی اور قیادت پر اعتماد رکھتے ہیں۔ ان کا کہنا تھا کہ عوام کی یہی حمایت کسی بھی جمہوری نظام میں سب سے بڑی طاقت ہوتی ہے۔

چندرابابو نائیڈو نے کہا کہ اپنی تقریباً پچاس سالہ عوامی زندگی میں انہوں نے کئی وزرائے اعظم کے ساتھ کام کیا اور ان کی قیادت کو قریب سے دیکھا، تاہم نریندر مودی کی شخصیت اور اندازِ حکمرانی منفرد ہے۔ ان کے مطابق مودی نے جدید طرز حکمرانی کو فروغ دینے کے ساتھ ساتھ بھارت کی قدیم تہذیب، ثقافت اور روایات کو بھی عالمی سطح پر نمایاں کیا ہے۔ انہوں نے کہا کہ ایک زمانے میں بھارت دنیا کی خوشحال اور ترقی یافتہ تہذیبوں میں شمار ہوتا تھا، لیکن آزادی کے بعد طویل عرصے تک ملک اپنی اصل شناخت اور صلاحیتوں سے پوری طرح فائدہ نہیں اٹھا سکا۔ نائیڈو کے مطابق مودی کی قیادت میں بھارت نے اپنا کھویا ہوا اعتماد دوبارہ حاصل کیا اور قومی فخر کے جذبے کو نئی توانائی ملی۔

وزیر اعلیٰ آندھرا پردیش نے مزید کہا کہ آج بھارت عالمی سیاست اور معیشت میں پہلے سے زیادہ خوداعتماد اور مؤثر کردار ادا کر رہا ہے۔ دنیا کی بڑی طاقتوں کے ساتھ اس کے تعلقات برابری اور باہمی احترام کی بنیاد پر استوار ہیں۔ انہوں نے کہا کہ بھارت اب کسی بھی عالمی طاقت کے دباؤ میں آنے کے بجائے اپنے قومی مفادات کو مقدم رکھتے ہوئے ’’انڈیا فرسٹ‘‘ کے اصول پر آگے بڑھ رہا ہے۔ نائیڈو نے اپنے مضمون کے اختتام پر کہا کہ تاریخ اس دور کو صرف معاشی ترقی یا سیاسی استحکام کی وجہ سے یاد نہیں رکھے گی بلکہ اسے بھارت کی نئی شناخت اور قومی بیداری کے دور کے طور پر بھی دیکھا جائے گا۔ انہوں نے یقین ظاہر کیا کہ 2047 تک ’’وکست بھارت‘‘ کے ہدف کے حصول کی سمت میں ملک تیزی سے آگے بڑھے گا اور آنے والے برس بھارت کے لیے مزید کامیابیوں اور ترقی کا پیغام لے کر آئیں گے۔

بھارت ایکسپریس اردو۔