Amit Shah Tributes Swami Vivekanand: دگ وجے دیوس پر امت شاہ نے سوامی وویکانند کو کیا یاد، نوجوانوں کو دیا بڑا پغایم

11 ستمبر 1893 کا دن ہندوستانی تاریخ کے سنہری ابواب میں شمار کیا جاتا ہے۔ اسی دن سوامی وویکانند نے امریکہ کے شکاگو میں عالمی مذہبی پارلیمنٹ سے خطاب کرتے ہوئے پوری دنیا کے سامنے ہندوستان کی روحانی اور ثقافتی اہمیت کو اجاگر کیا تھا۔ اس تاریخی شکاگو خطاب کی سالگرہ پر مرکزی وزیر داخلہ و تعاون امت شاہ نے ملک کے نوجوانوں سے خاص اپیل کی ہے۔ انہوں نے نوجوانوں سے کہا کہ وہ سوامی وویکانند کی اس تاریخی تقریر کا مطالعہ کریں اور خود کو قوم کی تعمیر کے مقدس مقصد کے لیے وقف کریں۔

’’سوامی جی نے ہندوستان کو روحانیت کے سرچشمے کے طور پر قائم کیا‘‘

سماجی رابطے کی ویب سائٹ پر اپنے پیغام میں امت شاہ نے کہا کہ سوامی وویکانند نے 1893 میں شکاگو کی عالمی مذہبی پارلیمنٹ میں ہندوستان کو پوری انسانیت کی روحانی ترقی کے سرچشمے کے طور پر پیش کیا۔ انہوں نے کہا کہ اس تاریخی خطاب کی سالگرہ ایک ایسا موقع ہے جب ملک کی نوجوان نسل کو سوامی وویکانند کے خیالات سے تحریک حاصل کرنی چاہیے۔ اس خطاب نے دنیا کو ہندوستان کی ثقافت اور اقدار کی عظمت اور گہرائی سے روشناس کرایا تھا۔

کیا تھا سوامی وویکانند کا تاریخی خطاب؟

11 ستمبر 1893 کو جب سوامی وویکانند نے اپنی تقریر کا آغاز امریکہ کے بہنوں اور بھائیوں کو مخاطب کرتے ہوئے کیا تو پورا ہال زوردار تالیوں سے گونج اٹھا تھا۔ ان کے خطاب نے پوری دنیا میں ہندوستانی روحانیت، رواداری اور عالمگیر بھائی چارے کا پیغام پہنچایا۔ سوامی وویکانند نے ہندوستان کو علم اور روحانیت کا مرکز قرار دیتے ہوئے دنیا کو یہ دکھایا کہ ہندوستانی ثقافت میں پوری انسانیت کو ایک دوسرے سے جوڑنے کی طاقت موجود ہے۔ ان کے خیالات نے مغربی دنیا پر گہرا اثر ڈالا اور ہندوستان کی روحانی روایت کی جانب عالمی توجہ مبذول کرائی۔

نوجوانوں کے لیے آج بھی تحریک کا بڑا ذریعہ ہیں وویکانند

امت شاہ کا یہ پیغام ایسے وقت میں سامنے آیا ہے جب ملک کی ترقی میں نوجوانوں کے کردار کو انتہائی اہم سمجھا جا رہا ہے۔ امت شاہ کے مطابق سوامی وویکانند کی زندگی اور ان کے خیالات آج بھی ملک کے نوجوانوں کے لیے تحریک کا ایک بڑا ذریعہ ہیں۔

اگر نوجوان سوامی وویکانند کے دکھائے ہوئے راستے پر چلیں اور ان کے نظریات کو اپنی زندگی میں اپنائیں تو ہندوستان کو عالمی طاقت بنانے کے مقصد کو مزید تیزی سے حاصل کیا جا سکتا ہے۔ ملک بھر میں تعلیمی اداروں، سیاسی پلیٹ فارموں اور سماجی تنظیموں کی جانب سے سوامی وویکانند کے تاریخی شکاگو خطاب کی سالگرہ عقیدت و احترام کے ساتھ منائی جا رہی ہے۔ امت شاہ کا یہ پیغام ملک کے کروڑوں نوجوانوں میں حب الوطنی، خود اعتمادی اور خدمت کا جذبہ پیدا کرنے کی ایک مؤثر کوشش کے طور پر دیکھا جا رہا ہے۔