BJP Manifesto Bengal: امت شاہ آج بنگال میں جاری کریں گے بی جے پی کا انتخابی منشور، روزگار اور خواتین کی حفاظت پر خصوصی فوکس

نئی دہلی :مغربی بنگال میں انتخابی سرگرمیاں عروج پر پہنچ گئی ہیں اور اسی دوران مرکزی وزیر داخلہ امت شاہ جمعہ کو ریاست کے اہم دورے پر پہنچ رہے ہیں۔ اس دورے کو سیاسی طور پر نہایت اہم قرار دیا جا رہا ہے کیونکہ وہ کولکاتا میں بھارتیہ جنتا پارٹی (بی جے پی) کا انتخابی منشور، جسے ’سَنکلپ پتر‘ کہا جا رہا ہے، جاری کریں گے۔ بنگال پہنچنے سے پہلے ہی امت شاہ نے ریاست کی حکمراں جماعت ترنمول کانگریس (ٹی ایم سی) اور وزیر اعلیٰ ممتا بنرجی پر سخت تنقید کی اور کہا کہ بنگال کی عوام اب تبدیلی چاہتی ہے۔

امت شاہ کا میگا پلان

امت شاہ نے سوشل میڈیا پلیٹ فارم ایکس (ٹوئٹر) پر اپنے پیغام میں کہا کہ مغربی بنگال کے عوام ٹی ایم سی حکومت سے تنگ آ چکی ہیں۔ انہوں نے دعویٰ کیا کہ بی جے پی کا سَنکلپ پتر ریاست کو ترقی کی نئی راہ پر گامزن کرے گا اور مبینہ طور پر خوف اور دباؤ کی سیاست کا خاتمہ کرے گا۔امت شاہ کا یہ دورہ صرف منشور جاری کرنے تک محدود نہیں ہوگا بلکہ ان کا شیڈول کافی مصروف رہے گا۔ وہ ڈیبرا میں ایک بڑی انتخابی ریلی سے خطاب کریں گے۔ اس کے بعد وہ کھڑگپور میں روڈ شو کریں گے، جسے پارٹی طاقت کے مظاہرے کے طور پر دیکھا جا رہا ہے۔

منشور میں کیا ہوگا خاص؟

بی جے پی ذرائع کے مطابق اس بار منشور میں عوامی مسائل اور معاشی راحت پر خاص توجہ دی جائے گی۔ پارٹی کی جانب سے لکشمی بھنڈار اسکیم کے جواب میں خواتین کو ماہانہ 3,000 روپے دینے کا اعلان متوقع ہے۔اس کے علاوہ بے روزگار نوجوانوں کے لیے ’یوا ساتھی‘ پروگرام کے تحت ماہانہ الاؤنس دینے کی تجویز بھی شامل ہو سکتی ہے۔ سرکاری ملازمین کو متوجہ کرنے کے لیے بی جے پی اقتدار میں آنے کے 45 دن کے اندر مہنگائی الاؤنس (ڈی اے) کے بقایاجات ادا کرنے کا وعدہ بھی کر سکتی ہے۔پارٹی ذرائع کے مطابق صحت اور تعلیم کے شعبوں کے لیے خصوصی پیکج، نئی صنعتی زونز کا قیام اور روزگار کے مواقع پیدا کرنا بھی بی جے پی کے ترقیاتی ایجنڈے کا اہم حصہ ہوں گے۔

عوامی تجاویز سے تیار منشور

بی جے پی کا دعویٰ ہے کہ یہ منشور صرف پارٹی قیادت نے تیار نہیں کیا بلکہ عوامی تجاویز کو مدنظر رکھ کر بنایا گیا ہے۔ اس مقصد کے لیے فروری سے ’وکست مغربی بنگال سَنکلپ پتر مشاورت مہم‘ چلائی گئی تھی۔ پارٹی کارکنان نے گھر گھر جا کر لوگوں سے تجاویز حاصل کیں۔پارٹی کے مطابق اس عمل میں ای میل، کیو آر کوڈ اور اضلاع میں ’آکانکشا سنگرہ باکس‘ کا استعمال کیا گیا۔ ڈاکٹروں، اساتذہ، کسانوں اور بیرون ریاست رہنے والے بنگالیوں کی آراء کی بنیاد پر منشور تیار کیا گیا ہے۔

بھارت ایکسپریس اردو