Amit Shah flies a kite in the Uttarayan Kite Festival in Naranpura, Ahmedabad: گاندھی نگر میں امت شاہ نے مکر سنکرانتی پر دکھائی پتنگ بازی کی مہارت، ویڈیو وائرل

نئی دہلی : سیاست کے میدان میں مخالفین کی ڈور کاٹنے میں ماہر مرکزی وزیرِ داخیر امت شاہ مکر سنکرانتی (اترائن) کے موقع پر ایک بالکل مختلف انداز میں نظر آئے۔ گجرات کے گاندھی نگر میں منعقدہ شاندار پتنگ میلے کے دوران امت شاہ نے دل کھول کر پتنگ بازی کا لطف اٹھایا۔ ہاتھ میں ڈور تھامے اور نظریں آسمان پر جمائے امت شاہ پوری طرح سے ’کائیپو چھے‘ کے رنگ میں رنگے دکھائی دیے۔

ڈور تھامی، پینچ لڑائے… مگر پتنگ کٹ گئی

تصاویر اور ویڈیوزمیں صاف دیکھا جا سکتا ہے کہ امت شاہ کارکنوں کے درمیان نہایت جوش و خروش کے ساتھ پتنگ اڑا رہے ہیں۔ اسی دوران ایک دلچسپ منظر بھی دیکھنے کو ملا، جب آسمان میں پینچ لڑاتے ہوئے وزیرِ داخلہ کی پتنگ کٹ گئی اور مانجھا نیچے آ گرا۔ قابل ذکر بات یہ ہے کہ پتنگ کٹنے کا افسوس ان کے جوش پر حاوی نہیں ہو سکا۔ وہ مسکراتے رہے اور کارکنوں کے ساتھ تہوار کی خوشیاں مناتے نظر آئے۔اس موقع پر گجرات کے وزیر اعلیٰ بھوپیندر پٹیل بھی اپنے اہلِ خانہ کے ساتھ چھت پر پتنگ بازی کا لطف اٹھاتے دکھائی دیے۔

اترائن پر ملک کو مبارکباد

پتنگ بازی کے ساتھ ساتھ امت شاہ نے سوشل میڈیا پلیٹ فارم ’ایکس‘ پر بھی ملک بھر کے عوام کو اترائن کی مبارکباد دی۔ انہوں نے سورج دیوتا سے سب کی خوشحالی، بھلائی اور منگل کی پرارتھنا کی۔ امت شاہ کے علاوہ بی جے پی کے قومی صدر جے پی نڈا، وزیر دفاع راج ناتھ سنگھ اور دیگر رہنماؤں نے بھی مکر سنکرانتی، پونگل اور بیہو کے موقع پر عوام کو نیک خواہشات پیش کیں۔واضح رہے کہ وزیرِ داخلہ امت شاہ کا تعلق گجرات سے ہے، جہاں مکر سنکرانتی کے موقع پر پتنگ بازی ایک قدیم روایت ہے۔ اسی وجہ سے امت شاہ کو بھی پتنگ اڑانے کا خاص شوق ہے۔ ہر سال ان کی پتنگ بازی کی ویڈیوز سامنے آتی ہیں، جو خوب چرچا میں رہتی ہیں۔ اگرچہ اکثر ان کی پتنگ کٹ جاتی ہے، لیکن سیاسی آسمان میں امت شاہ کو ہمیشہ دوسروں کی پتنگ کاٹتے ہوئے ہی دیکھا جاتا ہے۔

بھارت ایکسپریس اردو