Amit Shah congratulates Rajya Sabha nominees: وزیر داخلہ امت شاہ نے ہرش وردھن شرنگلا، اجـول نکم، سدانندن ماسٹر اور میناکشی جین کو راجیہ سبھا کے لیے نامزدگی پر دی مبارکباد

مرکزی وزیر داخلہ امت شاہ نے اتوار کے روز سابق خارجہ سکریٹری ہرش وردھن شرنگلا، ممتاز سرکاری وکیل اُجّول نکم، بزرگ سماجی کارکن سی سدانندن ماسٹر اور معروف مورخ میناکشی جین کو صدر کے ذریعہ راجیہ سبھا کے لیے نامزدگی پر مبارکباد دی۔ سوشل میڈیا پلیٹ فارم ’ایکس‘ پر ایک پوسٹ میں امت شاہ نے اپنے اپنے شعبوں میں ان کی بےمثال خدمات کی تعریف کی اور اس اعتماد کا اظہار کیا کہ ایوان بالا میں ان کی موجودگی قومی گفتگو کو تقویت بخشے گی اور ہندوستان کی ترقی کو آگے بڑھائے گی۔

وزیر داخلہ شاہ نے لکھا کہ ’’معزز تاریخ دان ڈاکٹر میناکشی جین جی، سابق سفارت کار شری ہرش وردھن شرنگلا جی، سماجی کارکن شری سی سدانندن ماسٹر جی اور سینئر ایڈوکیٹ شری اجول نکم جی کو صدر جمہوریہ کی طرف سے راجیہ سبھا کے لیے نامزد کیے جانے پر دلی مبارکباد۔ اپنے منتخب کردہ شعبوں میں مثالی شراکت کے ذریعے، آپ نے قوم کی عزت میں اضافہ کیا ہے۔ مجھے پختہ یقین ہے کہ آپ کے وسیع علم، تجربے اور قابلیت سے پارلیمنٹ میں ہمارے قومی مباحثے کو مزید تقویت ملے گی اور ہندوستان کاعظمت کی طرف سفر اور تیز ہوگا۔‘‘

اپنی خدمات کے لیے مشہور ہیں تمام نامزد اراکین

واضح رہے کہ ہرش وردھن شرنگلا، اجول نکم، میناکشی جین اور سدانندن ماسٹر کو آئین کے آرٹیکل 80(1)(a) کے تحت ایوان بالا کے لیے نامزد کیا گیا ہے۔اس طرح کی نامزدگی پہلے سے نامزد ارکان کی ریٹائرمنٹ سے پیدا ہونے والی خالی آسامیوں کے تناظر میں آتی ہے۔ ہرش وردھن شرنگلا نے، جو اپنے ممتاز سفارتی کیریئر کے لیے جانا جاتا ہے، ریاستہائے متحدہ اور بنگلہ دیش میں ہندوستان کے سفیر کے طور پر خدمات انجام دی ہیں۔ وہ جنوری 2020 سے اپریل 2022 تک سیکرٹری خارجہ بھی رہے۔

وہیں اجّول نکم ہائی پروفائل مجرمانہ مقدمات کو نمٹانے کے لیے مشہور ہیں، جن میں اجمل قصاب کے 26/11 ممبئی دہشت گردانہ حملوں کا مقدمہ اور 1993 کے بمبئی دھماکوں کا مقدمہ شامل ہے۔ دیگر نئے نامزد کردہ اراکین میں سی سدانندن ماسٹر شامل ہیں، جو کیرالہ کے ایک تجربہ کار سماجی کارکن اور ماہر تعلیم ہیں اور میناکشی جین، ایک مشہور مورخ اور ماہر تعلیم ہیں۔ دریں اثنا پی ایم مودی نے بھی سوشل میڈیا پلیٹ فارم ’ایکس‘ پر الگ الگ پوسٹس میں ان کو مبارکباد دیتے ہوئے قوم کی تعمیر میں ان کی خدمات کا اعتراف کیا۔ اس سے قبل وزارت داخلہ نے ایک باضابطہ نوٹیفکیشن کے ذریعے نامزدگیوں کا اعلان کیا۔

بھارت ایکسپریس اردو