Alankar Agnihotri reached Lucknow: استعفیٰ کے بعد اَلنکار اگنی ہوتری پہنچے لکھنؤ ، پولیس نے لگا یاسخت پہرا

بریلی میں سٹی مجسٹریٹ کے عہدے سے استعفیٰ دینے کے بعد اَلنکار اگنی ہوتری بدھ کے روز لکھنؤ پہنچے۔ ان کے دارالحکومت پہنچتے ہی سکیورٹی انتظامات اچانک سخت کر دیے گئے۔ کسی بھی ناخوشگوار صورتحال سے نمٹنے کے لیے بڑی تعداد میں پولیس فورس تعینات کی گئی ہے۔

عالم باغ میں رشتہ داروں کے گھر قیام

لکھنؤ پہنچنے کے بعد اَلنکار اگنی ہوتری سیدھے عالم باغ میں واقع اپنے رشتہ داروں کے گھر گئے۔ ان کی آمد کی اطلاع ملتے ہی پولیس نے علاقے میں سخت نگرانی شروع کر دی۔ گھر کے باہر سکیورٹی اہلکار تعینات کر دیے گئے اور بغیر جانچ کے کسی کو بھی اندر داخل ہونے کی اجازت نہیں دی جا رہی ہے۔

پولیس الرٹ موڈ پر

اس پورے معاملے کے سلسلے میں لکھنؤ پولیس الرٹ پر ہے۔ پولیس افسران  نے واضح کیا ہے کہ اگنی ہوتری کی سرگرمیوں پر مسلسل نظر رکھی جا رہی ہے۔ ان کی نقل و حرکت اور ملاقاتوں سے متعلق معلومات اکٹھی کی جا رہی ہیں تاکہ حالات پر مکمل کنٹرول رکھا جا سکے۔

سکیورٹی کے سخت انتظامات

پولیس ذرائع کے مطابق، عالم باغ میں جس گھر میں اگنی ہوتری ٹھہرے ہوئے ہیں، اس کے اطراف بیریکیڈنگ کر دی گئی ہے۔ آس پاس کے علاقوں میں گشت بڑھا دیا گیا ہے اور مقامی تھانے کو خصوصی ہدایات جاری کی گئی ہیں تاکہ سکیورٹی میں کسی قسم کی کمی نہ رہے۔

دارالحکومت میں چرچا

اَلنکار اگنی ہوتری کے استعفیٰ اور اس کے بعد لکھنؤ آمد سے انتظامی حلقوں میں بحث تیز ہو گئی ہے۔ لوگ یہ جاننے کے خواہشمند ہیں کہ ان کا اگلا قدم کیا ہوگا۔ فی الحال وہ پولیس نگرانی اور سخت سکیورٹی انتظامات کے درمیان عالم باغ میں ہی موجود ہیں۔ واضح رہے کہ شنکراچاریہ اویمکتیشورانند  تنازع اور اترپردیش میں بڑھتی نفرتی سیاست سے ناراض  اَلنکار اگنی ہوتری نے یہ کہہ کر سٹی مجسٹریٹ کے عہدے سے استعفیٰ دے دیا تھا کہ موجودہ یوگی حکومت یوجی سی قانون کی خلاف ورزی اور برہمنوں کی توہین کررہی ہے۔

بھارت ایکسپریس اردو۔