Akhilesh Yadav hits back at PM Modi’s remark: ڈرامہ کون کر رہا ہے سب جانتے ہیں، وزیراعظم مودی کے بیان پر اکھلیش یادو کا پلٹ وار

نئی دہلی: پارلیمنٹ کے سردی کے سیشن کے پہلے ہی دن ووٹرس لسٹ کے اسپیشل انٹینسیو ریویژن (ایس آئی آر) کو لے کر زبردست ہنگامہ دیکھنے کو ملا، جس کے بعد لوک سبھا کی کارروائی ملتوی کرنی پڑی۔ اسی معاملے پر سماج وادی پارٹی کے صدر اکھلیش یادو نے حکومت پر شدید حملہ بولا اور الزام لگایا کہ ایس آئی آر کے نام پر ووٹ کاٹنے کی سازش ہو رہی ہے۔

اکھلیش یادو نے کہا کہ “جمہوریت تب مضبوط ہوگی، جب ووٹ ڈالنے کا حق نہ چھینا جائے۔” انہوں نے دعویٰ کیا کہ ملک بھرمیں بہت سی جگہوں پر BLO کو شدید دباؤ کا سامنا ہے اور انہیں مناسب ٹریننگ کے بغیر کام کرنا پڑ رہا ہے۔ یادو نے کہا کہ ایس آئی آر کا مقصد جمہوریت کو مضبوط کرنا ہونا چاہیے، لیکن بی جے پی چاہتی ہے کہ زیادہ سے زیادہ ووٹ حذف کیے جائیں۔

ڈرامہ کون کر رہا ہے، سب جانتے ہیں

وزیراعظم نریندر مودی کے “یہاں ڈرامہ نہیں، ڈلیوری ہونی چاہیے“ والے بیان پر سخت ردعمل دیتے ہوئے اکھلیش یادو نے کہا: ڈرامہ کون کر رہا ہے یہ سب جانتے ہیں۔ جو BLO کی جان جا رہی ہے کیا یہ ڈرامہ ہے؟ بی جے پی پولیس کے ساتھ مل کر ڈرامہ کرتی ہے اور ووٹروں پر پستول رکھ دیتی ہے۔

اکھلیش نے الزام لگایا کہ بی جے پی کے پاس بڑے وسائل ہیں اور وہ ایک بڑی نوئیڈا کمپنی کو ہائر کر کے ووٹر لسٹ پر کام کروا رہی ہے۔ انہوں نے کہا کہ: 2024 میں جن بوتھوں پر بی جے پی ہاری، وہیں ووٹ کاٹے جا رہے ہیں۔ شادیوں کے موسم میں ایس آئی  آر کیوں کرایا جا رہا ہے؟ الیکشن کمیشن بی جے پی کے خواب پورے کر رہا ہے۔

سپا ایم پی اوَدھیش پرساد کا ردعمل

ایس پی کے رکن پارلیمنٹ اودھیش پرساد نے کہا کہ وزیراعظم کے خیالات کا وہ احترام کرتے ہیں لیکن حقیقت مختلف ہے۔ انہوں نے کہا: جمہوریت پر حملہ ہو رہا ہے، ووٹ کاٹے جا رہے ہیں، عوام کے سلگتے مسائل پر بحث ضروری ہے اور اسی پر ایوان میں بات ہونی چاہیے۔

بھارت ایکسپریس اردو