Akhilesh Yadav Speech in Lok Sabha: عتیق احمد کا نام لئے بغیر اکھلیش یادو نے لوک سبھا میں کہا- کس نے نہیں دیکھا کہ ٹی وی پرچلتے ہوئے

نئی دہلی: سماجوادی پارٹی کے قومی صدر اکھلیش یادو اور اترپردیش واقع قنوج سے رکن پارلیمنٹ اکھلیش یادو نے یوگی حکومت پر بڑا حملہ بولا ہے۔ یوم آئین (سنودھان دیوس) کے 75 ویں سالگرہ کے موقع پر لوک سبھا میں یوپی کے سابق وزیراعلیٰ اکھلیش یادو نے سابق رکن پارلیمنٹ عتیق احمد کے قتل کا ذکر کیا۔

یوپی کے سابق وزیراعلیٰ نے کہا کہ کس نے نہیں دیکھا کہ ٹی وی پر چلتے ہوئے لوگوں کی جان لے لی گئی۔ لائیو دیکھا ہے سب نے۔ انہوں نے کہا کہ آج کے وقت میں اگرکسی کو انصاف چاہئے تو تحصیل سے وزیراعلیٰ کی رہائش گاہ تک لوگ خود کشی کررہے ہیں۔ قابل ذکرہے کہ عتیق احمد کا پولیس حراست کے دوران 15 اپریل 2023 کو قتل کردیا گیا تھا۔ اسی قتل سانحہ میں عتیق احمد کے بھائی اشرف کوبھی گولی ماردی گئی تھی۔ موقع پر ہی دونوں لیڈران کی موت ہوگئی تھی۔ اس قتل سانحہ کوانجام دینے والے سبھی ملزم فی الحال جیل میں بند ہیں اوران پرالزام کئے جا رہے ہیں۔

کسٹوڈین ڈیتھ میں یوپی سب سے آگے: اکھلیش یادو

انہوں نے کہا کہ ہمارا صوبہ کسٹوڈین ڈیتھ میں سب سے آگے جا رہا ہے۔ خواتین کے استحصال میں سب سے آگے جا رہا ہے۔ یہ حکومت کے اعدادوشمار بتا رہے ہیں۔ سائبر جرائم میں سب سے آگے یوپی نظرآرہا ہے۔ ڈبل انجن کی حکومت میں پہلے انجن ٹکراتے تھے، اب ڈبّے (کوچ) بھی ٹکراتے ہیں۔

اس کے علاوہ اکھلیش یادو نے کہا کہ ریزرویشن نہ دینا پڑے، اس لئے سرکاری نوکریاں نہیں ہیں۔ جان بوجھ کر پیپرلیک کرایا جاتا ہے، تاکہ امتحانات منسوخ کئے جاسکیں۔ عوام نے 400 کے نعرے کو گرا دیا اور آئین بدلنے کے خواب کو توڑنے کا کام کیا۔ بہت سارے ساتھی اِدھر کے ہی اُدھرہیں۔ اگراُدھر والے آگئے تو اسی دن اقتدار سے یہ باہر ہوجائیں گے۔