Multi-Layer Election Mafia: بی جے پی بن چکی ہے ’ملٹی لیئر الیکشن مافیا‘… ای وی ایم سے ہرا کر ای وی ایم ہٹائیں گے…‘‘، ایس پی صدر اکھلیش یادو کا بڑا بیان

لکھنؤ: اکھلیش یادو نے ہفتہ کے روز بی جے پی حکومت پر شدید حملہ کرتے ہوئے الزام لگایا کہ ملک اور ریاست میں ’ملٹی لیئر الیکشن مافیا‘ سرگرم ہے، جو جمہوریت اور آئین کو کمزور کرنے میں لگی ہوئی ہے۔ لکھنؤ میں سماج وادی پارٹی کے ہیڈکوارٹر میں مہارانا پرتاپ جینتی کے موقع پر منعقدہ پریس کانفرنس سے خطاب کرتے ہوئے اکھلیش یادو نے کہا کہ بی جے پی کے پاس عوام کے سامنے پیش کرنے کے لیے کوئی مثبت کارکردگی نہیں ہے، اسی لیے وہ سماج میں نفرت، تقسیم اور ٹکراؤ کی سیاست کر رہی ہے۔ انہوں نے کہا کہ جمہوریت اور آئین کو بچانے کے لیے اپوزیشن جماعتوں اور عوام کو متحد ہو کر جدوجہد کرنی ہوگی۔

ووٹر لسٹ میں گڑبڑی کا الزام

سماج وادی پارٹی کے صدر نے الزام لگایا کہ انتخابات کے دوران ووٹر لسٹ سے نام حذف کرنے اور فارم-7 کے ذریعے اپوزیشن کے ووٹروں کو متاثر کرنے کا منظم کھیل کھیلا جا رہا ہے۔ انہوں نے کہا کہ 2019 میں جن لوگوں نے ووٹ ڈالے تھے، ان میں سے کئی افراد کے نام 2022 کی ووٹر لسٹ سے غائب کر دیے گئے تھے۔

ای وی ایم پر پھر اٹھائے سوال

اکھلیش یادو نے ای وی ایم کے استعمال پر بھی سوال اٹھاتے ہوئے کہا کہ دنیا کے کئی ترقی یافتہ ممالک آج بھی بیلٹ پیپر کے ذریعے انتخابات کراتے ہیں۔ انہوں نے کہا، ’’ہماری مانگ رہے گی کہ انتخابات بیلٹ پیپر سے کرائے جائیں۔ آئندہ انتخابات میں ہم بی جے پی کو ای وی ایم سے ہرا کر ای وی ایم کو ہی ہٹانے کا کام کریں گے۔‘‘

EC اورلا اینڈ آرڈر پر تنقید

انہوں نے الیکشن کمیشن پر بھی غیر فعال رہنے کا الزام عائد کیا اور کہا کہ متعدد شکایات کے باوجود کوئی مؤثر کارروائی نہیں کی گئی۔ ریاست کی لا اینڈ آرڈر کی صورت حال پر حملہ بولتے ہوئے اکھلیش یادو نے کہا کہ جو لوگ ’زیرو ٹالرنس‘ کی بات کرتے تھے، انہوں نے لا اینڈ آرڈر کو ہی ’زیرو‘ بنا دیا ہے۔ ان کے مطابق این سی آر بی کے اعداد و شمار حکومت کی ناکامی کی گواہی دے رہے ہیں۔

2027 کے لیے بڑے وعدے

اکھلیش یادو نے اعلان کیا کہ اگر 2027 میں سماج وادی پارٹی کی حکومت بنتی ہے تو مہارانا پرتاپ جینتی پر دو دن کی سرکاری تعطیل دی جائے گی۔ ساتھ ہی گومتی ریور فرنٹ پر مہارانا پرتاپ کا ایک شاندار مجسمہ نصب کیا جائے گا، جس میں چیتک گھوڑا اور سنہرا بھالا بھی دکھایا جائے گا۔ انہوں نے مزید کہا کہ سماج وادی پارٹی کی حکومت بننے پر کے جی سے پی جی تک لڑکیوں کی تعلیم مفت کی جائے گی اور غریبوں کو مفت علاج فراہم کیا جائے گا۔

بھارت ایکسپریس۔