Akhilesh slams BJP as ‘use-and-throw’ party: ’’بی جے پی ’استعمال کرو اور پھینک دو‘ پارٹی ہے، اس نے پچھلے نائب صدر کے ساتھ بھی یہی کیا‘‘، اکھلیش یادو نے حکمراں پارٹی پر کی سخت تنقید

نائب صدر کے انتخاب کے دوران سماج وادی پارٹی کے صدر اکھلیش یادو نے بھارتیہ جنتا پارٹی (بی جے پی) پر سخت تنقید کرتے ہوئے اسے ’’استعمال کرو اور پھینک دو‘‘ (Use-and-Throw) پارٹی قرار دیا۔ انھوں نے الزام عائد کیا کہ بی جے پی نے سابق نائب صدر جگدیپ دھنکھر کے ساتھ بھی یہی سلوک کیا ہے، جو اپنے استعفے کے بعد سے اب تک منظر عام پر نہیں آئے ہیں۔

اکھلیش یادو نے کہا کہ اگرچہ این ڈی اے کے پاس عددی اکثریت ہو سکتی ہے، مگر اس انتخاب میں اصل چیز ضمیر کی آواز ہے۔ انھوں نے کہا کہ ’’نمبر اپنی جگہ، لیکن یہ ووٹنگ ضمیر کی بنیاد پر ہونی چاہیے۔ پوری قوم جانتی ہے کہ بی جے پی ایک استعمال کرو اور پھینک دو پارٹی ہے۔ یہی کچھ پچھلے نائب صدر کے ساتھ ہوا، جو اب ’لاپتہ‘ ہیں۔ مجھے یقین ہے کہ نتائج ہمارے حق میں ہوں گے۔‘‘ دریں اثنا سماج وادی پارٹی کے ایک اور لیڈر اور رکنِ پارلیمنٹ راجیو رائے نے بھی اپیل کی کہ این ڈی اے کے اراکین ’’ضمیر کی آواز پر لبیک کہیں‘‘ اور آئین کی حفاظت کرنے والے امیدوار کو ووٹ دیں۔ انھوں نے کہا کہ ’’میں این ڈی اے کے ساتھیوں سے اپیل کرتا ہوں کہ وہ آئین کے تحفظ کی خاطر پارٹی لائن سے ہٹ کر فیصلہ کریں۔‘‘

یہ بیان اس وقت سامنے آیا جب 15ویں نائب صدر کے انتخاب کے لیے ووٹنگ منگل کی صبح شروع ہوئی۔ وزیر اعظم نریندر مودی نے سب سے پہلے ووٹ ڈالا۔ انتخاب میں این ڈی اے کی جانب سے سی پی رادھا کرشنن اور اپوزیشن کی جانب سے سابق سپریم کورٹ جج جسٹس بی سدرشن ریڈی امیدوار ہیں۔ اگرچہ بی جے پی امیدوار کو 427 ووٹوں کی حمایت حاصل ہونے کا دعویٰ ہے، لیکن اپوزیشن نے ’’کراس ووٹنگ‘‘ کی بنا پر فتح کی امید ظاہر کی ہے۔

بھارت ایکسپریس اردو