Jammu Kashmir Flash Flood: جموں و کشمیر میں موسلادھار بارش سے تباہی، سیلاب و لینڈ سلائیڈنگ سے 10 افراد ہلاک، امت شاہ نے امدادی کارروائیوں کا لیا جائزہ

نئی دہلی :جموں و کشمیر میں مسلسل ہونے والی موسلادھار بارش نے بڑے پیمانے پر تباہی مچا دی ہے۔ خاص طور پر پونچھ اور راجوری کے علاقوں میں اچانک آنے والے سیلاب اور لینڈ سلائیڈنگ کے باعث اب تک 10 افراد کی موت کی تصدیق ہو چکی ہے، جب کہ متعدد افراد کے لاپتا ہونے کی اطلاعات ہیں۔ انتظامیہ کو خدشہ ہے کہ امدادی اور تلاشی کارروائیاں آگے بڑھنے کے ساتھ ہلاکتوں میں اضافہ بھی ہو سکتا ہے۔سب سے زیادہ نقصان پونچھ کے سرنکوٹ علاقے میں ہوا، جہاں اچانک آنے والے شدید سیلابی ریلے اور ملبے نے کئی مکانات کو اپنی لپیٹ میں لے لیا۔ اس افسوسناک حادثے میں ایک ہی خاندان کے 6 افراد سمیت مجموعی طور پر نو افراد جان کی بازی ہار گئے، جب کہ حویلی علاقے میں ایک شخص کی موت کی بھی تصدیق ہوئی ہے۔ کئی مکانات مکمل یا جزوی طور پر تباہ ہو گئے ہیں اور لوگوں کا قیمتی سامان پانی میں بہہ گیا۔

Union Home Minister Shri Amit Shah spoke with the Lieutenant Governor of Jammu and Kashmir, Shri Manoj Sinha, and Chief Minister Shri Omar Abdullah regarding the situation caused by heavy rainfall and assured them of all possible assistance from the Central Government.

— गृहमंत्री कार्यालय, HMO India (@HMOIndia) July 19, 2026

مسلسل بارش کے باوجود ریاستی ڈیزاسٹر رسپانس فورس (ایس ڈی آر ایف) ،نیشنل ڈیزاسٹر رسپانس فورس(این ڈی آر ایف) اور ضلعی انتظامیہ کی ٹیمیں متاثرہ علاقوں میں امدادی اور بچاؤ کارروائیوں میں مصروف ہیں۔ جہاں سڑکوں کے ذریعے پہنچنا ممکن نہیں، وہاں کشتیوں، ڈرونز اور ہیلی کاپٹروں کی مدد سے لوگوں کو محفوظ مقامات پر منتقل کیا جا رہا ہے۔ لاپتا افراد کی تلاش بھی جاری ہے۔انتظامیہ نے متعدد خاندانوں کو محفوظ مقامات پر منتقل کر دیا ہے۔ امدادی کیمپوں میں متاثرین کے لیے خوراک، پینے کا صاف پانی، ادویات اور دیگر ضروری سہولیات فراہم کی جا رہی ہیں، جبکہ زخمیوں کا مختلف اسپتالوں میں علاج جاری ہے۔ادھر ہماچل پردیش بھی شدید بارش سے متاثر ہوا ہے۔ ضلع چمبہ کے بھٹیات علاقے میں لاہڈو-سنہوٹا سڑک پر بڑے پیمانے پر لینڈ سلائیڈنگ ہوئی، جس کے نتیجے میں پہاڑ کا ایک بڑا حصہ سڑک پر آ گرا اور اہم شاہراہ مکمل طور پر بند ہو گئی۔ خوش قسمتی سے اس وقت وہاں کوئی گاڑی یا راہگیر موجود نہیں تھا، ورنہ بڑا جانی نقصان ہو سکتا تھا۔ یہ سڑک دھرم شالہ، چمبہ اور ڈلہوزی کو جوڑنے والی اہم شاہراہ ہے، جس کی بندش سے مقامی لوگوں اور سیاحوں کو شدید مشکلات کا سامنا ہے۔

صورتحال کی سنگینی کو دیکھتے ہوئے مرکزی وزیر داخلہ امت شاہ نے جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ سے ٹیلی فون پر گفتگو کر کے تازہ صورتحال کا جائزہ لیا۔ انہوں نے مرکز کی جانب سے ہر ممکن تعاون کی یقین دہانی کراتے ہوئے کہا کہ ضرورت پڑنے پر اضافی وسائل بھی فوری فراہم کیے جائیں گے۔ مرکزی اور ریاستی ادارے مشترکہ طور پر امدادی سرگرمیوں کو تیز کرنے اور متاثرہ خاندانوں کی بحالی کے لیے اقدامات کر رہے ہیں۔محکمہ موسمیات نے خبردار کیا ہے کہ جموں و کشمیر، ہماچل پردیش اور اتراکھنڈ کے مختلف علاقوں میں آئندہ چند روز تک شدید بارش کا سلسلہ جاری رہ سکتا ہے۔ پونچھ میں 77 ملی میٹر سے زائد بارش ریکارڈ کی گئی ہے، جس کے باعث ندی نالے بپھر گئے ہیں اور کئی علاقوں میں سیلابی صورتحال برقرار ہے۔ انتظامیہ نے عوام سے اپیل کی ہے کہ خراب موسم کے دوران غیر ضروری سفر سے گریز کریں، دریاؤں اور ندی نالوں کے قریب جانے سے بچیں اور پہاڑی علاقوں میں انتہائی احتیاط برتیں۔

بھارت ایکسپریس اردو