CEO of Anthropic, Dario Amodei: اے آئی زیادہ تر انسانوں کی ذہنی صلاحیتوں سے آگے نکل جائے گی، اینتھروپک سی ای او داریو امدی کا دعویٰ

نئی دہلی :امریکی مصنوعی ذہانت کمپنی Anthropic کے چیف ایگزیکٹو آفیسر داریو امدی نے کہا ہے کہ دنیا ایک ایسے انقلابی موڑ کے قریب پہنچ چکی ہے، جہاں اے آئی نظام زیادہ تر ذہنی کاموں میں انسانوں کی اکثریت کو پیچھے چھوڑ دیں گے۔ انہوں نے خبردار کیا کہ یہ پیش رفت جہاں بیماریوں اور غربت جیسے بڑے مسائل کے حل کے بے مثال مواقع فراہم کرے گی، وہیں اس کے غلط استعمال اور معاشی بے ترتیبی جیسے سنگین خطرات بھی موجود ہوں گے۔نئی دہلی کے بھارت منڈپم کنونشن سینٹر میں منعقدہ انڈیا اے آئی امپیکٹ سمٹ سے خطاب کرتے ہوئے داریو امدی نے کہا کہ گزشتہ دہائی میں اے آئی صلاحیتوں میں ترقی ایک تیز رفتار اور مسلسل بڑھتی ہوئی لکیر پر گامزن رہی ہے، جسے انہوں نے ذہانت کے لیے مورز لا سے تشبیہ دی۔ ان کا کہنا تھا کہ معاشرہ اس سفر میں کافی آگے آ چکا ہے اور اب صرف چند سال باقی ہیں جب اے آئی ماڈلز زیادہ تر شعبوں میں انسانوں کی ذہنی صلاحیتوں سے تجاوز کر جائیں گے۔

 داریو امدی نے کہا کہ ہم اس تصور کے قریب پہنچ رہے ہیں، جسے وہ ڈیٹا سینٹر میں ذہین افراد کے ایک ملک سے تعبیر کرتے ہیں، یعنی ایسے اے آئی ایجنٹس جو زیادہ تر کاموں میں انسانوں سے زیادہ قابل ہوں اور غیر معمولی رفتار سے آپس میں ہم آہنگی پیدا کر سکیں۔ ان کے مطابق یہ پیش رفت انسانی تاریخ میں بے مثال ہوگی اور اس کے اثرات نہایت گہرے ہوں گے۔

بیماریوں کے علاج اور غربت کے خاتمے میں بڑی پیش رفت ممکن

داریو امدی نے کہا کہ اے آئی کے ذریعے ہزاروں برس سے لاعلاج سمجھی جانے والی بیماریوں کا علاج ممکن ہو سکتا ہے، جس سے انسانی صحت میں انقلابی بہتری آئے گی۔ انہوں نے کہا کہ اربوں افراد کو غربت سے نکالنے، خاص طور پر گلوبل ساؤتھ کے ممالک میں ترقی کے نئے دروازے کھولنے اور سب کے لیے بہتر دنیا بنانے کا حقیقی امکان موجود ہے۔

انہوں نے بھارت میں موجود جوش اور صلاحیت کی بھی تعریف کی اور کہا کہ گزشتہ چند دنوں میں انہوں نے بھارتی صنعتکاروں اور ٹیکنالوجی ماہرین سے ملاقات کی ہے، جہاں مل کر کچھ نیا تعمیر کرنے کی بے مثال توانائی محسوس ہوئی۔بھارت میں اپنی وابستگی کو مضبوط کرتے ہوئے داریو امدی نے اعلان کیا کہ اینتھروپک نے اس ہفتے بنگلورو میں اپنا دفتر قائم کیا ہے اور تین دہائیوں سے بھارت میں کاروباری سرگرمیوں کا وسیع تجربہ رکھنے والی آئرینا گھوش کو اینتھروپک انڈیا کی منیجنگ ڈائریکٹر مقرر کیا گیا ہے۔ انہوں نے یہ بھی تصدیق کی کہ کمپنی نے بھارتی اداروں کے ساتھ نئی شراکت داریاں کی ہیں، جن میں سرکردہ آئی ٹی کمپنی Infosys بھی شامل ہے۔

بھارت ایکسپریس اردو