India AI Impact Summit 2026: اے آئی میں بھارت کو مواقع اور مستقبل کی نئی سمت نظر آتی ہے: وزیر اعظم مودی

نئی دہلی: وزیر اعظم نریندر مودی نے کہا ہے کہ مصنوعی ذہانت (اے آئی) انسانی تہذیب کی تاریخ میں ایک انقلابی تبدیلی کی حیثیت رکھتی ہے اور بھارت اسے ایک بڑے موقع اور روشن مستقبل کی سمت کے طور پر دیکھ رہا ہے۔ انہوں نے زور دے کر کہا کہ آج ہم اے آئی کے بارے میں جو کچھ دیکھ اور اندازہ لگا رہے ہیں، وہ اس کے اثرات کی محض ابتدائی جھلک ہے۔ دارالحکومت میں واقع بھارت منڈپم میں منعقدہ ’انڈیا اے آئی امپیکٹ سمٹ 2026‘ کے افتتاح کے موقع پر خطاب کرتے ہوئے وزیر اعظم نے کہا کہ دنیا کا سب سے بڑا اور تاریخی اے آئی اجلاس بھارت میں منعقد ہو رہا ہے، جو عالمی آبادی کے تقریباً چھٹے حصے کی نمائندگی کرتا ہے۔ انہوں نے کہا کہ یہ سمٹ نہ صرف تکنیکی ترقی بلکہ عالمی تعاون کی بھی ایک اہم مثال ہے۔

وزیر اعظم مودی نے کہا کہ بھارت دنیا کی سب سے بڑی نوجوان آبادی، وسیع ٹیکنالوجی ٹیلنٹ پول اور تیزی سے ترقی کرتا ہوا ٹیک پر مبنی ایکو سسٹم رکھتا ہے۔ بھارت نئی ٹیکنالوجیز کی تخلیق کے ساتھ ساتھ انہیں غیر معمولی رفتار سے اپنانے کی صلاحیت بھی رکھتا ہے۔ ان کے مطابق 140 کروڑ بھارتی شہری نئی ٹیکنالوجیز کو اپنانے کے لیے پُرجوش ہیں، جو ملک کی ترقی کی رفتار کو مزید تقویت دے رہے ہیں۔

انہوں نے سمٹ میں شریک مختلف ممالک کے سربراہان، عالمی اے آئی ماہرین اور اختراع کاروں کا خیر مقدم کرتے ہوئے کہا کہ نوجوانوں کی بڑی تعداد میں شرکت نئے اعتماد اور توانائی کا مظہر ہے۔ انہوں نے کہا کہ نئی ٹیکنالوجی کے حوالے سے ابتدا میں شکوک و شبہات پیدا ہوتے ہیں، لیکن جس رفتار اور یقین کے ساتھ نوجوان اے آئی کو اپنا رہے ہیں، وہ غیر معمولی ہے۔ وزیر اعظم نے سمٹ کی نمائش کا ذکر کرتے ہوئے کہا کہ زراعت، قومی سلامتی، معذور افراد کی مدد اور کثیر لسانی ضروریات کو پورا کرنے جیسے شعبوں میں پیش کیے گئے ’میڈ اِن انڈیا‘ حل ملک کی اختراعی صلاحیت کو ظاہر کرتے ہیں۔ ان کے مطابق اے آئی نہ صرف مشینوں کو ذہین بنا رہی ہے بلکہ انسانی صلاحیتوں کو کئی گنا بڑھا رہی ہے۔

انہوں نے کہا کہ اے آئی ایک تبدیلی لانے والی طاقت ہے، اگر اسے بغیر سمت کے چھوڑ دیا جائے تو یہ انتشار پیدا کر سکتی ہے، لیکن درست رہنمائی کے ساتھ یہ مسائل کا حل بن سکتی ہے۔ انہوں نے اے آئی کا تقابل جی پی ایس سے کرتے ہوئے کہا کہ جی پی ایس راستہ بتاتا ہے مگر فیصلہ انسان ہی کرتا ہے۔ اسی طرح اے آئی کو کھلا میدان ملنا چاہیے، لیکن اس کا کنٹرول انسان کے ہاتھ میں رہنا ضروری ہے۔ وزیر اعظم نے مزید کہا کہ اے آئی اعلیٰ قدر کے تخلیقی اور بامعنی روزگار کے مواقع پیدا کرے گی، جس سے اختراع، کاروبار اور نئے صنعتی شعبوں کو فروغ ملے گا۔ انہوں نے ہنرمندی، ازسرِ نو تربیت اور عمر بھر سیکھنے کو عوامی تحریک بنانے پر زور دیا اور کہا کہ اگر پوری انسانیت مل کر آگے بڑھے تو مصنوعی ذہانت انسانی صلاحیتوں کو نئی بلندیوں تک لے جا سکتی ہے۔

بھارت ایکسپریس اردو۔