Road Accident: اسکون پل پر ہولناک حادثہ، بھیڑ کو روندتی چلی گئی جیگوار، 9 افراد ہلاک، 15 سے زائد زخمی

Ahmedabad Road Accident: گجرات کے احمد آباد میں واقع اسکون پل پر ایک خوفناک سڑک حادثہ پیش آیا ہے۔ حادثے میں 9 افراد ہلاک اور 15 سے 20 افراد زخمی ہوئے ہیں۔ معلومات کے مطابق آدھی رات کو اسکون پل پر تھار گاڑی اور ڈمپر کے درمیان تصادم ہوا۔ حادثے کو دیکھنے کے لیے پل پر لوگوں کی بھیڑ جمع تھی۔ اسی دوران ایک تیز رفتار جیگوار کار لوگوں کو روندتی چلی گئی۔

حادثے میں 9 افراد ہلاک ہو گئے۔ جاں بحق ہونے والوں میں ایک پولیس کانسٹیبل اور ہوم گارڈ بھی شامل ہے، جو تھار اور ڈمپر حادثے کے بعد کارروائی کے لیے موقع پر پہنچے تھے۔

جیگوار ڈرائیور بھی زخمی

دیش گجرات نے پولیس کے حوالے سے بتایا ہے کہ بدھ-جمعرات کی درمیانی رات سرکھیج-گاندھی نگر ہائی وے پر اسکون فلائی اوور پر ایک مہندرا تھار نے پیچھے سے ایک ڈمپر کو ٹکر مار دی۔ حادثے کے بعد وہاں لوگوں کی بڑی تعداد جمع ہو گئی۔ زخمیوں کو اسپتال منتقل کرنے کی تیاریاں کی جا رہی تھیں کہ ایک تیز رفتار کار وہاں سے گزری اور ہجوم کو روند ڈالا۔

یہ بھی پڑھیـں- Maharashtra: راج گڑھ میں چٹان پھسلنے سے 4 افراد ہلاک، 21 شدید زخمی، امدادی کام جاری

حادثے میں کار ڈرائیور بھی زخمی ہوا، اسے اسپتال میں داخل کرایا گیا ہے۔ دوہرے حادثے کے بعد پولیس کی بڑی تعداد موقع پر پہنچ گئی اور ریسکیو کا کام شروع کر دیا گیا۔ پولیس نے پورے اسکون پل کو بند کر دیا۔

-بھارت ایکسپریس