India-Italy Joint Declaration: وزیر اعظم مودی اور جارجیا میلونی کی تاریخی ملاقات، تجارت، دفاع اور ٹیکنالوجی سمیت کئی بڑے معاہدوں پر اتفاق

نئی دہلی : بھارت اور اٹلی نے سال 2029 تک دوطرفہ تجارت کو 20 ارب یورو تک پہنچانے کے ہدف پر اتفاق کیا ہے۔ وزیر اعظم نریندر مودی اور اٹلی کی وزیر اعظم جارجیا میلونی کے درمیان بدھ کے روز ہوئی اہم ملاقات کے بعد جاری مشترکہ بیان میں کہا گیا کہ دونوں ممالک بھارت-یورپی یونین آزاد تجارتی معاہدے (ایف ٹی اے)سے حاصل ہونے والے مواقع سے فائدہ اٹھاتے ہوئے اقتصادی تعاون کو نئی بلندیوں تک لے جانا چاہتے ہیں۔مشترکہ بیان کے مطابق دونوں لیڈروں  نے اقتصادی اور تجارتی تعلقات میں حالیہ برسوں کے دوران آئی تیزی، بڑھتی سرمایہ کاری اور طویل مدتی شراکت داری پر اطمینان ظاہر کیا۔ گزشتہ سال منعقد ہونے والے تین بزنس فورمز کے تبادلوں کا بھی خیر مقدم کیا گیا۔ دونوں رہنماؤں نے دفاع، ڈیجیٹل ٹیکنالوجی، توانائی، بنیادی ڈھانچے اور لاجسٹکس سے وابستہ بھارتی اور اطالوی صنعتکاروں اور سی ای اوز سے بھی ملاقات کی۔بیان میں کہا گیا کہ دونوں ممالک نے بھارت-یورپی یونین ایف ٹی اے کے جلد نفاذ پر زور دیا تاکہ تجارت اور سرمایہ کاری کے نئے مواقع پیدا کیے جا سکیں۔

خلائی تحقیق، اے آئی اور جدید ٹیکنالوجی میں تعاون

وزیر اعظم مودی اور جارجیا میلونی نے خلائی تحقیق، مصنوعی ذہانت (اے آئی) ، سیمی کنڈکٹر، اہم معدنیات اور جدید ٹیکنالوجی کے شعبوں میں تعاون بڑھانے پر بھی زور دیا۔ دونوں لیڈروں  نے اٹالین اسپیس ایجنسی اور اسرو(آئی ایس آر او) کے درمیان جاری تعاون کو سراہا اور تجارتی خلائی شراکت داری کو مزید مضبوط بنانے کے عزم کا اظہار کیا۔ مشترکہ بیان کے مطابق بھارت کی باصلاحیت افرادی قوت اور اٹلی کی تکنیکی صلاحیت  کے امتزاج سے ان شعبوں میں نئے مواقع پیدا ہوں گے۔ دونوں ممالک نے کنیکٹیویٹی انفراسٹرکچر کو مضبوط بنانے اور انڈیا-مڈل ایسٹ-یورپ اکنامک کوریڈور  (آئی ایم ای سی)کے نفاذ کے لیے بھی اپنی وابستگی دہرائی۔

ثقافت، سمندری ورثہ اور دفاعی شراکت داری

دونوں لیڈروں نے گجرات کے لوتھل میں قومی سمندری ورثہ کمپلیکس کی ترقی میں تعاون اور بھارت سے نرسوں کی بھرتی سے متعلق معاہدوں کا بھی خیر مقدم کیا۔ اس کے علاوہ اٹلی میں مقیم بھارتی برادری کے کردار کو اہمیت میں طلبہ، محققین اور ماہرین تعلیم کی آمدورفت کو آسان بنانے پر اتفاق کیا گیا۔بھارت اور اٹلی نے سال 2027 کو “بھارت-اٹلی ثقافت اور سیاحت سال” کے طور پر منانے کا بھی فیصلہ کیا۔ دونوں ممالک نے دفاعی شعبے میں مشترکہ مفاہمتی اعلامیہ اور دفاعی مصنوعات کے مشترکہ ڈیزائن، ترقی اور پیداوار کے لیے صنعتی روڈ میپ پر دستخط کا خیر مقدم کیا۔وزیر اعظم نریندر مودی نے اطالوی حکومت اور عوام کی جانب سے ملنے والے پرخوش استقبال پر جارجیا میلونی کا شکریہ ادا کیا اور انہیں مناسب وقت پر بھارت آنے کی دعوت بھی دی۔

بھارت ایکسپریس اردو