دہلی میں آلودگی اپنے عروج پر
نئی دہلی: دارالحکومت دہلی میں ہوا کا معیار مسلسل بگڑ رہا ہے اور حالات اتنے سنگین ہو گئے ہیں کہ ایئر کوالٹی انڈیکس 500 کو پار کر گیا ہے۔ اس کو لے کر عام آدمی پارٹی نے بھارتیہ جنتا پارٹی پر زور دار حملہ کیا ہے۔
پارٹی کے سینئر لیڈر اور سابق نائب وزیر اعلیٰ منیش سسودیا نے سخت حملہ کیا۔ انہوں نے کہا، ’’بی جے پی حکومت کے چاروں انجن دہلی میں دھواں چھوڑ رہے ہیں۔ یہاں اے کیو آئی 500 ہے، جس کا مطلب زہر! نہ دھوپ دکھتی ہے اور نہ سانس لی جاتی ہے۔ آنکھوں میں جلن اور گلے میں خراش ہو رہی ہے۔‘‘
سسودیا نے حکومت پر الزام لگاتے ہوئے کہا کہ نہ تو مرکزی حکومت اور نہ ہی دہلی کے لیفٹیننٹ گورنر کے پاس کوئی منصوبہ ہے، نہ ہی کوئی جوابدہی اور نہ ہی کوئی ایمرجنسی پلان۔ انہوں نے کہا، ’’صرف تقریر اور جملے دیے جا رہے ہیں، جبکہ دہلی والوں کو اب تقریر نہیں، سانس چاہیے، جملے نہیں، زندگی چاہیے۔‘‘
عآپ ایم ایل اے آتشی نے بھی سوشل میڈیا کے ذریعہ بی جے پی کو نشانہ بنایا۔ انہوں نے لکھا، ’’دہلی کا AQI مئی کے مہینے میں پہلے کبھی اتنا نہیں بڑھا۔ CPCB (مرکزی آلودگی کنٹرول بورڈ) کے اعداد و شمار کے مطابق، 2022 سے 2024 تک، 15 مئی کو اے کیو آئی کبھی 243 سے اوپر نہیں گیا تھا۔ لیکن آج AQI 500 سے اوپر ہے۔ کیا بی جے پی اس سنگین صورتحال کی ذمہ داری لے گی؟ دہلی کے وزیر ماحولیات کہاں ہیں؟‘‘
عام آدمی پارٹی کا کہنا ہے کہ دہلی میں آلودگی کی یہ سطح نہ صرف صحت کے لیے خطرناک ہے بلکہ یہ انتظامی ناکامی کی طرف بھی اشارہ کرتی ہے۔ ماہرین کے مطابق AQI 500 کا مطلب ہے کہ فضائی آلودگی کی سطح انتہائی خطرناک ہے اور یہ خاص طور پر بچوں، بوڑھوں اور سانس کی بیماریوں میں مبتلا افراد کے لیے جان لیوا ثابت ہو سکتی ہے۔ عام آدمی پارٹی نے مطالبہ کیا ہے کہ ہنگامی منصوبہ کو فوری طور پر نافذ کیا جائے اور مرکزی حکومت اور لیفٹیننٹ گورنر کے دفتر کو آلودگی پر قابو پانے کے لیے ٹھوس کارروائی کرنی چاہیے۔
بھارت ایکسپریس۔
این ویڈیا کے سابق سربراہ نے بورڈ کی آزادانہ تحقیقات میں تعاون کا یقین دلایا،…
وزیراعظم مودی نے اہم معدنیات اور کان کنی کے شعبے میں مضبوط سپلائی چین قائم…
کواڈ کا قیام 2007 میں عمل میں آیا تھا، جبکہ 2017 میں اس کے درمیان…
منیلا میں کواڈ اجلاس سے خطاب کرتے ہوئے وزیر اعظم نے اس شہر کے ساتھ…
سرمایہ کاروں کو ہر ہفتے 6 سے 11 فیصد منافع دینے کا لالچ دے کر…
چیف جسٹس سوریہ کانت کی سربراہی والی بنچ نے راہل گاندھی اور دیگر درخواست گزاروں…