Adani Power To Acquire JP Power Stake: اڈانی پاور کا جے پرکاش پاور میں بڑا سرمایہ کاری معاہدہ، 4194 کروڑ روپے میں حصص اور تھرمل پلانٹ خریدنے کا اعلان

نئی دہلی: اڈانی پاور نے جمعرات کو اعلان کیا ہے کہ کمپنی نے جے پرکاش ایسوسی ایٹس لمیٹڈ کے ساتھ حتمی معاہدوں پر دستخط کیے ہیں، جن کے تحت وہ جے پرکاش پاور وینچرز لمیٹڈ میں 24 فیصد حصص اور اتر پردیش کے چرک تھرمل پاور پلانٹ کو مجموعی طور پر 4194 کروڑ روپے میں حاصل کرے گی۔اسٹاک ایکسچینج کو دی گئی اطلاع کے مطابق اڈانی پاور نے شیئر پرچیز ایگریمنٹ پر دستخط کیے ہیں، جس کے تحت جے پرکاش ایسوسی ایٹس کی جے پرکاش پاور وینچرز میں 24 فیصد شراکت تقریباً 2993.6 کروڑ روپے میں خریدی جائے گی۔اس کے علاوہ کمپنی نے ایک بزنس ٹرانسفر ایگریمنٹ بھی کیا ہے، جس کے تحت سون بھدر ضلع میں واقع 180 میگاواٹ صلاحیت والے چرک تھرمل پاور پلانٹ اور اس سے منسلک اثاثے 1200 کروڑ روپے میں حاصل کیے جائیں گے۔ اس معاہدے میں پریاگ راج پاور جنریشن کمپنی لمیٹڈ میں 11.49 فیصد حصص بھی شامل ہیں۔

کمپنی کے مطابق یہ تمام سودے نیشنل کمپنی لا ٹریبونل (این سی ایل ٹی) سے منظور شدہ ریزولوشن پلان کا حصہ ہیں۔ اس منصوبے میں اڈانی انٹرپرائزز لمیٹڈ ریزولوشن اپلیکنٹ ہے، جبکہ اڈانی پاور ان معاہدوں کو نافذ کرنے والی اہم کمپنیوں میں شامل ہے۔اڈانی پاور پہلے ہی جے پرکاش گروپ کے ریزولوشن عمل میں دلچسپی ظاہر کر چکی تھی اور اب تازہ معاہدوں کے ذریعے اس حصولی عمل کو باضابطہ شکل دے دی گئی ہے۔کمپنی نے کہا ہے کہ دونوں سودے ریزولوشن پلان میں طے شدہ “ایفیکٹو ڈیٹ” پر نقد ادائیگی کے ذریعے مکمل کیے جائیں گے۔ تاہم اس کے لیے ضروری ریگولیٹری منظوریوں اور نفاذ کے مقررہ مراحل کو پورا کرنا لازمی ہوگا۔

کمپیٹیشن کمیشن آف انڈیا (سی سی آئی) نے اس معاہدے کو اگست 2025 میں منظوری دی تھی، جبکہ این سی ایل ٹی نے مارچ 2026 میں ریزولوشن پلان کی منظوری دی۔ بعد ازاں نیشنل کمپنی لا اپیلیٹ ٹریبونل (این سی ایل اے ٹی) نے بھی اس فیصلے کو برقرار رکھا۔جے پرکاش پاور وینچرز لمیٹڈ تھرمل اور ہائیڈرو پاور منصوبوں کے ذریعے مجموعی طور پر 2220 میگاواٹ بجلی پیدا کرنے کی صلاحیت رکھتی ہے۔ اس کے علاوہ کمپنی کانکنی اور سیمنٹ کے شعبوں میں بھی سرگرم ہے۔اتر پردیش کے سون بھدر ضلع میں واقع چرک تھرمل پاور پلانٹ کی پیداواری صلاحیت 180 میگاواٹ ہے۔

بھارت ایکسپریس اردو