Adani Group is committed to leveraging its global expertise: گوتم اڈانی نے دوسری بار ڈونالڈ ٹرمپ کو دی مبارکباد،متعدد پروجیکٹ میں 10 بلین ڈالر کی سرمایہ کاری کے عزم کا بھی اعادہ کیا

امریکہ میں صدارتی انتخابات (امریکی انتخابات 2024) کے نتائج آ چکے ہیں۔ ریپبلکن پارٹی کے ڈونلڈ ٹرمپ امریکہ کے 47ویں صدر ہوں گے۔ ٹرمپ نے ڈیموکریٹک پارٹی کی امیدوار کملا ہیرس کو بھاری ووٹوں سے شکست دی ہے۔ امریکی صدارتی انتخابات میں کامیابی پر ٹرمپ کو دنیا بھر سے مبارکبادیں موصول ہو رہی ہیں، اڈانی گروپ کے چیئرمین گوتم اڈانی نے بھی سوشل میڈیا کے ذریعے دوسری بار ٹرمپ کو امریکہ کا نیا صدر بننے پر مبارکباد دی ہے۔انہوں نے ساتھ میں ہندوستان اور امریکہ کے مابین شراکت داری کو مزید مضبوط کرنے کا بھی عزم ظاہر کیا ہے۔

گوتم اڈانی نے اپنے ایکس پوسٹ میں لکھا کہ جیت مبارک ہو ڈونالڈ ٹرمپ۔ جیسے جیسے ہندوستان اور امریکہ کے درمیان شراکت داری گہری ہوتی جارہی ہے، اڈانی گروپ اپنی عالمی مہارت سے فائدہ اٹھانے اور 15,000 تک ملازمتیں پیدا کرنے کے مقصد سے امریکی توانائی کی حفاظت اور لچکدار بنیادی ڈھانچے کے منصوبوں میں 10 بلین ڈالر کی سرمایہ کاری کرنے کے لیے پرعزم ہے۔

اڈانی گروپ کے چیئرمین گوتم اڈانی نے اس سے پہلے بھی ڈونلڈ ٹرمپ کو امریکی صدارتی انتخاب جیتنے پر مبارکباد دی تھی۔اس پیغام میں  انہیں مبارکباد دیتے ہوئے، انہوں نے سوشل میڈیا پلیٹ فارم پر لکھا کہ امریکہ کی جمہوریت کو اپنے لوگوں کو بااختیار بناتے ہوئے اور ملک کے بانی اصولوں کو برقرار رکھتے ہوئے امریکہ کے 47 ویں منتخب صدر کو مبارکباد۔واضح رہے کہ ڈونلڈ ٹرمپ کی بطور امریکی صدر حلف برداری کی تقریب 20 جنوری 2025 کو ہوگی۔ ڈونلڈ ٹرمپ امریکہ کے 47ویں صدر کی حیثیت سے اپنی مدت پوری کرنے کے بعد 82 برس کے ہو جائیں گے۔ اب ان کی عمر 78 سال ہے۔ ایسی صورت حال میں وہ امریکہ کے معمر ترین صدر بھی ہوں گے۔

بھارت ایکسپریس۔