Adani Group, Embraer Announce Strategic Collaboration On Regional Aircraft In India: میڈ اِن انڈیا کو تقویت، اڈانی گروپ اور ایمبریئر کا بھارت میں علاقائی طیاروں کی تیاری پر اسٹریٹجک اشتراک

نئی دہلی: اڈانی گروپ اور برازیل کی معروف ایوی ایشن کمپنی ایمبریئر نے منگل کے روز بھارت میں علاقائی ٹرانسپورٹ طیاروں کی تیاری کے لیے ایک اسٹریٹجک اشتراک کا اعلان کیا۔ اس تعاون کے تحت بھارت میں ریجنل طیاروں کے لیے فائنل اسمبلی لائن قائم کرنے کا منصوبہ ہے، جس کا مقصد میڈ اِن انڈیا اور آتم نربھر بھارت پہل کو مزید مضبوط بنانا ہے۔ یہ شراکت داری شہری ہوا بازی کی وزارت میں منعقدہ ایک تقریب کے دوران سامنے آئی۔ اس موقع پر سول ایوی ایشن کے سیکریٹری سمیر کمار سنہا نے کہا کہ یہ معاہدہ صرف طیاروں کی اسمبلی تک محدود نہیں، بلکہ اس میں ٹیکنالوجی کی منتقلی، ہنرمندی کی ترقی، مضبوط سپلائی چین کی تشکیل اور بھارت کو علاقائی طیاروں کی تیاری کا قابل اعتماد مرکز بنانے کا وژن شامل ہے۔

ایمبریئر کے صدر اور سی ای او آرجن میئر نے معاہدے پر اطمینان کا اظہار کرتے ہوئے کہا کہ بھارت میں ایوی ایشن کے شعبے کا مستقبل روشن ہے اور حالات میڈ اِن انڈیا کو آگے بڑھانے کے لیے سازگار ہو رہے ہیں۔ انہوں نے اڈانی گروپ پر اعتماد ظاہر کرتے ہوئے کہا کہ سپلائی چین، مینٹیننس، مرمت، آپریشنز اور پائلٹ ٹریننگ میں اڈانی کی مہارت اس شراکت کو مضبوط بنیاد فراہم کرے گی۔ میئر کے مطابق، اس تعاون کے ذریعے بھارت میں سپلائی چین کی تعمیر اور مقامی صنعت کے ساتھ گہرا اشتراک ممکن ہوگا، جس سے آنے والے برسوں میں مکمل طور پر میڈ اِن انڈیا علاقائی طیارہ تیار کرنے کی راہ ہموار ہوگی۔ انہوں نے یہ بھی کہا کہ اس منصوبے سے ملک بھر میں سیاحت کو فروغ ملے گا اور عام شہریوں کے لیے فضائی سفر مزید قابل رسائی بنے گا۔

اڈانی ڈیفنس اینڈ ایرو اسپیس کے ڈائریکٹر جیت اڈانی نے کہا کہ ایمبریئر کے ساتھ شراکت داری بھارت میں علاقائی طیاروں کی تیاری کے ایک نئے دور کا آغاز ہے۔ ان کے مطابق یہ اقدام محض ایک کاروباری معاہدہ نہیں بلکہ بھارت کی صنعتی حکمت عملی کا ایک اہم ستون ہے، جو ملک میں عالمی معیار کی ایوی ایشن صلاحیتوں کی تعمیر کی عکاسی کرتا ہے۔تقریب میں دفاعی سیکریٹری راجیش کمار سنگھ بھی موجود تھے،

جنہوں نے کہا کہ یہ اشتراک بھارت کے دفاعی اور ایرو اسپیس شعبے میں عالمی سطح پر شراکت داری، صلاحیت سازی اور طویل مدتی اسٹریٹجک ہم آہنگی کی عکاسی کرتا ہے۔ ایمبریئر، جو 150 نشستوں تک کے کمرشل جیٹس تیار کرتی ہے، اس معاہدے کے ذریعے بھارت کی تیزی سے بڑھتی ہوئی شہری ہوا بازی کی منڈی میں اپنی موجودگی مزید مضبوط کرے گی۔

بھارت ایکسپریس اردو