Adani Green Energy: اڈانی گرین انرجی نے 20 گیگاواٹ قابلِ تجدید توانائی کی صلاحیت کا سنگِ میل کیا پار ، بھارت کے صاف و شفاف توانائی کے سفر میں نئی کامیابی

اڈانی گرین انرجی لمیٹڈ (AGEL) نے 20 گیگاواٹ (GW) فعال قابلِ تجدید توانائی کی پیداواری صلاحیت حاصل کرتے ہوئے بھارت کی پہلی رینیوایبل انرجی کمپنی ہونے کا اعزاز حاصل کر لیا ہے، جس نے بنیادی طور پر گرین فیلڈ منصوبوں کے ذریعے یہ تاریخی سنگِ میل عبور کیا ہے۔

صرف ایک دہائی قبل تمل ناڈو کے کاموتھی میں اپنا پہلا منصوبہ شروع کرنے والی کمپنی آج بھارت کی تیزی سے ترقی کرنے والی قابلِ تجدید توانائی کمپنی بن چکی ہے۔کمپنی اس وقت ہر سال 52 ارب یونٹ سے زائد صاف توانائی پیدا کر رہی ہے، جو بھارت کی سالانہ بجلی کی مجموعی کھپت کا تقریباً تین فیصد بنتی ہے۔ یہ بجلی ایک سال تک نیویارک شہر کی ضروریات پوری کرنے یا ممبئی اور نئی دہلی جیسے بڑے شہروں کی تقریباً مکمل بجلی کی طلب پوری کرنے کے لیے کافی ہے۔

مالی سال 2025-26 کے دوران اڈانی گرین انرجی نے 5,051 میگاواٹ نئی قابلِ تجدید توانائی کی صلاحیت کا اضافہ کیا، جو چین سے باہر کسی بھی کمپنی کی جانب سے ایک سال میں کیا جانے والا سب سے بڑا اضافہ قرار دیا جا رہا ہے۔

شمسی، ہوا اور بیٹری اسٹوریج میں توسیع

کمپنی کے موجودہ آپریشنل پورٹ فولیو میں تقریباً 14.2 گیگاواٹ شمسی توانائی، 2.7 گیگاواٹ ہوا سے بجلی اور 3.3 گیگاواٹ ونڈ-سولر ہائبرڈ صلاحیت شامل ہے۔اس کے علاوہ کمپنی نے 3.55 گیگاواٹ گھنٹہ (GWh) بیٹری انرجی اسٹوریج سسٹم (BESS) بھی فعال کر دیا ہے، جو چین سے باہر دنیا کا سب سے بڑا بیٹری اسٹوریج منصوبہ ہے۔ اس سے چوبیس گھنٹے قابلِ اعتماد صاف توانائی کی فراہمی ممکن ہوگی۔

کچھ میں دنیا کا سب سے بڑا رینیوایبل انرجی پارک

اڈانی گرین انرجی گجرات کے ضلع کچھ میں واقع خواڈا میں دنیا کے سب سے بڑے قابلِ تجدید توانائی منصوبے کو بھی تیزی سے وسعت دے رہی ہے۔ 538 مربع کلومیٹر پر پھیلے اس منصوبے کی مجموعی منصوبہ بند صلاحیت 30 گیگاواٹ ہے۔

کمپنی اب تک اس مقام پر 9.5 گیگاواٹ شمسی توانائی فعال کر چکی ہے، جو منصوبے کی کل متوقع صلاحیت کا 30 فیصد سے زیادہ ہے۔

کمپنی کے ایگزیکٹو ڈائریکٹر ساگر اڈانی نے کہا کہ 20 گیگاواٹ کا یہ سنگِ میل منظم عمل درآمد، جدید ٹیکنالوجی اور بھارت کے صاف توانائی کے مستقبل کے لیے کمپنی کے طویل مدتی وژن کا ثبوت ہے۔

کمپنی کا ہدف مالی سال 2026-27 کے دوران مزید 10 گیگاواٹ گھنٹہ بیٹری اسٹوریج کا اضافہ کرنا اور آئندہ پانچ برسوں میں اپنی بیٹری ذخیرہ کرنے کی مجموعی صلاحیت 50 گیگاواٹ گھنٹہ تک پہنچانا ہے۔ اڈانی گرین انرجی کا مقصد 2030 تک 50 گیگاواٹ قابلِ تجدید توانائی کی صلاحیت حاصل کرنا، بھارت کی توانائی کے تحفظ کو مضبوط بنانا اور کاربن کے اخراج میں کمی کے قومی اہداف کو فروغ دینا ہے۔

بھارت ایکسپریس اردو۔