‘تیجسوی یادوکی جان کو خطرہ، 4 بارمارنے کی ہوئی کوشش’، رابڑی دیوی نے کیا بڑا دعویٰ ایس آئی آر سے متعلق جے ڈی یو-بی جے پی حکومت پر کی سخت تنقید

جمعرات کو آرجے ڈی لیڈرتیجسوی یادواوربہارکے نائب وزیراعلیٰ سمراٹ چودھری کے درمیان اسمبلی میں تلخ بحث ہوئی۔ دراصل، تیجسوی یادو نے اسمبلی کے مانسون سیشن کے دوران الیکشن کمیشن کے ذریعہ چل رہے ووٹرلسٹ سے متعلق خصوصی نظرثانی مہم (ایس آئی آر) کے بارے میں تشویش ظاہرکی، جس پر بی جے پی لیڈراوربہارکے نائب وزیراعلیٰ کے درمیان گرما گرمی دیکھنے کو ملی۔ آرجے ڈی لیڈر تیجسوی یادونے الزام لگایا کہ ایس آئی آرعمل کے دوران بی ایل او خود فارم پردستخط کررہے ہیں۔ اس بات کی مخالفت کرتے ہوئے سمراٹ چودھری نے ان پرذاتی حملہ کرتے ہوئے کہا کہ تم کیا کہو گے، تمہارا باپ بھی مجرم (اپرادھی) ہے۔ سمراٹ چودھری نے کہا کہ دفع ہوجاؤ۔ تم لٹیرا ہواورلٹیرا کیا کہے گا؟

سوشل میڈیا پربھی بحث ہوئی گرم

اسمبلی کے ہنگامہ کے بعد دونوں لیڈران کی سوشل میڈیا پر بھی بحث تیز ہوگئی۔ تیجسوی یادو نے اپنے سوشل میڈیا اکاؤنٹ پرایک ویڈیو شیئرکیا، جس میں نائب وزیراعلیٰ سمراٹ چودھری کے والد شکنی چودھری وزیراعظم مودی کو زمین میں گاڑنے کی دھمکی دے رہے ہیں۔ انہوں نے اپنے پوسٹ میں لکھا کہ بہار کے نائب وزیراعلیٰ سمراٹ چودھری کے عزت مآب والد وزیراعظم کوبہارکی زمین میں گاڑنے کی دھمکی دے رہے ہیں۔ انہوں نے کہا کہ سمراٹ چودھری کے والد کی غیرمہذب دھمکی کے خوف سے وزیراعظم نے انہیں بہارکا نائب وزیر اعلیٰ بنا دیا ہے۔