77th Republic Day parade: کرتویہ پتھ پر ثقافت، عسکری طاقت اور ٹیکنالوجی کا امتزاج، 30 جھانکیاں، جانوروں کا خصوصی دستہ اور ’آپریشن سندور‘ کے بعد فوجی اشتراک کا ہوگا مظاہرہ

نئی دہلی: 77ویں یوم جمہوریہ پریڈ 2026 ملک کی ثقافتی وراثت، عسکری قوت اور تکنیکی ترقی کی بھرپور عکاسی کرے گی۔ اس سال کی پریڈ کئی اعتبار سے تاریخی ہوگی، جس میں پہلی بار بھیرو لائٹ کمانڈو بٹالین، ری ماونٹ اینڈ ویٹرنری کور (RVC) کا جانوروں پر مشتمل خصوصی دستہ اور 2025 کے آپریشن سندور کے بعد بھارتی افواج کے باہمی اشتراک (Jointness) کی نمایاں نمائش شامل ہے۔ کرتویہ پتھ پر مجموعی طور پر 30 جھانکیاں پیش کی جائیں گی، جو’سوتنترتا کا منتر: وندے ماترم‘ اور’سمردھی کا منتر: آتم نربھر بھارت‘ کے موضوعات پر مبنی ہوں گی۔ ان میں 17 جھانکیاں ریاستوں اور مرکز کے زیرِ انتظام علاقوں کی ہوں گی، جن میں آسام کی ٹیرراکوٹا دستکاری، منی پور کی زرعی ترقی اور ہماچل پردیش کی شناخت بطور دیو بھومی شامل ہے، جبکہ 13 جھانکیاں وزارتوں اور خدمات کی ہوں گی، جن میں بھارتی فضائیہ کی جانب سے سابق فوجیوں کے اعزاز میں خصوصی جھانکی بھی شامل ہے۔

دارالحکومت میں سخت سکیورٹی کے انتظامات

صدر جمہوریہ دروپدی مرمو پیر 26 جنوری کو کرتویہ پاتھ پر یومِ جمہوریہ کی تقریبات کی قیادت کریں گی۔ قومی دارالحکومت میں سخت حفاظتی انتظامات کیے گئے ہیں اور کرتویہ پتھ و رائے سینا ہل کے اطراف کثیر سطحی سکیورٹی نافذ کی گئی ہے۔ یوم جمہوریہ کی شام، اتوار 25 جنوری کو صدرِ جمہوریہ قوم سے خطاب کریں گی۔ یہ خطاب شام 7 بجے آل انڈیا آکاشوانی نیٹ ورک اور دوردرشن کے تمام چینلز پر نشر کیا جائے گا، جس کے بعد انگریزی اور علاقائی زبانوں میں نشریات ہوں گی۔

فوجی طاقت اور ’آپریشن سندور‘ کی جھلک

پریڈ میں بھارتی فوج کی مرحلہ وار جنگی ترتیب، مکینائزڈ کالم، مارچنگ دستے، فوجی بینڈز اور تینوں افواج کی مشترکہ جھانکی ’آپریشن سندور: اشتراک کے ذریعے فتح‘ پیش کی جائے گی، جو بھارت کی جدید عسکری حکمت عملی اور دیسی دفاعی صلاحیتوں کو اجاگر کرے گی۔ بھارتی فضائیہ کی جانب سے سابق فوجیوں کے لیے خصوصی جھانکی بھی شامل ہوگی۔ یورپی کونسل کے صدر انتونیو دی کوسٹا اور یورپی کمیشن کی صدر ارسولا فان ڈر لیئن یوم جمہوریہ پریڈ 2026 کے مہمانِ خصوصی ہوں گے۔ روایت کے مطابق قومی پرچم لہرایا جائے گا، قومی ترانہ پڑھا جائے گا اور دیسی ساختہ 105 ملی میٹر لائٹ فیلڈ گنز سے 21 توپوں کی سلامی دی جائے گی۔

وزیراعظم کا نیشنل وار میموریل پر خراج عقیدت

تقریب کا آغاز وزیراعظم نریندر مودی کے نیشنل وار میموریل کے دورے سے ہوگا، جہاں وہ شہداء کو خراج عقیدت پیش کریں گے، اس کے بعد وہ کرتویہ پتھ پر سلامی اسٹیج سے پریڈ کا مشاہدہ کریں گے۔ تقریب میں مختلف شعبوں سے تعلق رکھنے والے 10 ہزار خصوصی مہمان شریک ہوں گے، جن میں پیرا ایتھلیٹس، قدرتی کھیتی کرنے والے کسان، اسرو اور ڈی آر ڈی او کے سائنس دان، اور گرین ہائیڈروجن مشن سے وابستہ صنعت کار شامل ہیں۔ مرکزی دہلی میں 1000 سے زائد اےچ ڈی سی سی ٹی وی کیمرے نصب کیے گئے ہیں، جو چہرہ شناس نظام سے لیس ہیں۔ پہلی بار دہلی پولیس اے آئی اسمارٹ گلاسز کا استعمال کرے گی۔ ٹریفک پابندیاں نافذ رہیں گی اور عوام کے لیے ہدایات جاری کی گئی ہیں۔

فضائی مظاہرہ اور ’سندور فارمیشن‘

پریڈ کا اختتام بھارتی فضائیہ کے 29 طیاروں کے فلائی پاسٹ سے ہوگا۔ اس موقع پر ’سندور فارمیشن‘ پیش کی جائے گی، جس میں رافیل، سوخوئی-30، مگ-29 اور جگوار لڑاکا طیارے شامل ہوں گے۔ کرتویہ پتھ پر 2500 ثقافتی فنکار ہم آہنگ ثقافتی مظاہرہ بھی پیش کریں گے۔ پہلی بار بھارتی فوج کے RVC کا خصوصی جانوروں پر مشتمل دستہ پریڈ کا حصہ ہوگا، جس میں بیکٹرین اونٹ، شکاری پرندے اور بھارتی نسل کے فوجی ڈاگس شامل ہوں گے، جو لداخ اور سیاچن جیسے علاقوں میں ان کے کردار کو اجاگر کریں گے۔

اگنی ویر اور خواتین کی تاریخی شرکت

اس سال بھارتی فضائیہ کے مارچنگ بینڈ میں اگنی ویر شامل ہوں گے۔ یہ پہلا موقع ہوگا کہ خواتین اگنی ویر یوم جمہوریہ پریڈ میں بینڈ پرفارمنس دیں گی۔ پریڈ کے بعد 26 سے 31 جنوری تک لال قلعہ میں بھارت پرو منعقد ہوگا، جبکہ یوم جمہوریہ کی تقریبات کا اختتام 28 جنوری کو کاریپا پریڈ گراؤنڈ میں وزیراعظم کی این سی سی ریلی سے ہوگا۔

بھارت ایکسپریس اردو۔