Anti-Naxal operation in Chhattisgarh: چھتیس گڑھ میں 11 خواتین سمیت 24 نکسلیوں نے کی خودسپردگی، ہتھیار ڈالنے والوں میں سے 14 کے سر پر تھا کل 28.50 لاکھ کا انعام

پیر کو چھتیس گڑھ کے بیجاپور ضلع میں 11 خواتین سمیت 24 نکسلیوں نے خودسپردگی کی۔ 21 اپریل سے تلنگانہ کی سرحد سے متصل بیجاپور کی پہاڑیوں پر تقریباً 24,000 سیکیورٹی اہلکاروں کے ساتھ ایک بڑے پیمانے پر نکسل مخالف آپریشن کے درمیان ہتھیار ڈال دیے گئے ہیں۔ ایک پولیس اہلکار نے بتایا کہ ہتھیار ڈالنے والوں میں سے 14 کے سر پر کل 28.50 لاکھ روپے کا انعام تھا۔

بیجاپور کے سپرنٹنڈنٹ آف پولیس جتیندر کمار یادو نے کہا کہ ’’ہتھیار ڈالنے والے نکسلیوں نے نکسلی نظریات سے اختلاف اور حکومت کی ’نیاد نیلنار‘ یعنی ’اپنا پیارا گاؤں‘ جیسی اسکیموں سے متاثر ہو کر یہ قدم اٹھایا۔‘‘ انھوں نے مزید کہا کہ ’’ہتھیار ڈالنے والے کیڈرز کا تعلق ماؤنوازوں کے مشرقی بستر ڈویژن، پرتاپور ایریا کمیٹی اور مغربی بستر ڈویژن سے ہے۔ ان میں سے بھیرام گڑھ ایریا کمیٹی کے ممبر سدرو ہیملا (33) اور پرتاپور ایریا کمیٹی کے ممبر کملی موڈیم عرف ارمیلا (36) کے سر پر 5 لاکھ روپے کے انعامات تھے۔ وہیں جیموتی پونم (24) اور منگو پونم (21) پر بالترتیب 3 لاکھ اور 50,000 روپے کا انعام تھا۔‘‘

ضلع میں اب تک 200 سے زیادہ نکسلی ڈال چکے ہیں ہتھیار

انھوں نے کہا کہ مذکورہ نکسلیوں کی تازہ خودسپردگی کے ساتھ اب تک 203 نکسلیوں نے ضلع میں ہتھیار ڈال دیے ہیں، جب کہ 90 مارے گئے ہیں اور 213 کو گرفتار کیا گیا ہے۔ انھوں نے کہا کہ ہتھیار ڈالنے والے تمام نکسلیوں کو 50,000 روپے کی امداد فراہم کی گئی ہے اور حکومت کی پالیسی کے مطابق ان کی بازآبادکاری بھی کی جائے گی۔ پولیس کے مطابق بیجاپور سمیت سات اضلاع پر مشتمل بستر خطہ میں گزشتہ سال کل 792 نکسلیوں نے خودسپردگی کی تھی۔

واضح رہے کہ حکومت نے چھتیس گڑھ کے کئی اضلاع میں نکسلیوں کے خلاف بڑے پیمانے پر آپریشن شروع کر رکھا ہے۔ حکومت نکسل ازم کے خاتمے کے لیے فورسز کے ساتھ ساتھ کئی ترغیبی اسکیموں کا بھی سہارا لے رہی ہے، جن میں ہتھیار ڈالنے والے نکسلیوں کی بازآباد کاری اور حکومتی امداد جیسی اسکیمیں اہم کردار ادا کر رہی ہیں۔

بھارت ایکسپریس اردو