US Strikes Key Iranian Bridge: امریکہ نے ایران کے ایک اہم پل پر کیا حملہ، ٹرمپ کی وارننگ، ابھی بہت کچھ ہونا باقی ہے

واشنگٹن: امریکی فوج نے ایران میں ایک اہم ہائی وے پل کو نشانہ بنایا ہے، جس کے بعد دونوں ممالک کے درمیان کشیدگی مزید بڑھ گئی ہے۔ ادھر امریکی صدر ڈونلڈ ٹرمپ نے ایران کو خبردار کرتے ہوئے معاہدہ کرنے کی اپیل کی ہے۔ انہوں نے کہا کہ ایران کو سمجھوتہ کرنا چاہیے، ورنہ ’آگے مزید کارروائی ہو سکتی ہے‘۔

تہران اور کرج کو جوڑنے والا پل پر حملہ
یہ حملہ بی ون پل پر کیا گیا، جو تہران کو قریبی شہر کرج سے جوڑتا ہے۔ امریکی فوج کے ایک عہدیدار کے مطابق یہ پل ایران کی میزائل اور ڈرون فورس کے لیے سامان کی ترسیل کا ایک اہم راستہ تھا، اسی لیے اسے نشانہ بنایا گیا۔

ایران کا دعویٰ: پل زیر استعمال نہیں تھا
دوسری جانب ایران کے سرکاری میڈیا نے کہا کہ یہ پل ابھی فعال نہیں تھا اور فوج اس کا استعمال نہیں کر رہی تھی۔ حکام کے مطابق اس حملے میں کم از کم آٹھ افراد ہلاک جبکہ کئی دیگر زخمی ہوئے، جن میں نوروز کے موقع پر باہر موجود عام شہری بھی شامل تھے۔

صدر ڈونلڈ ٹرمپ نے حملے کی تعریف کی
ڈونلڈ ٹرمپ نے سوشل میڈیا پر اس حملے کی تعریف کرتے ہوئے لکھا، ’’ایران کا سب سے بڑا پل گرا دیا گیا ہے، اب اس کا کبھی استعمال نہیں ہوگا۔ ابھی اور بھی بہت کچھ ہونا باقی ہے!‘‘ انہوں نے ایران کو یہ بھی خبردار کیا کہ ’بہت دیر ہونے سے پہلے سمجھوتہ کر لو‘۔

بڑی حکمت عملی کا حصہ: امریکی حکام
امریکی حکام نے بتایا کہ یہ کارروائی ایران کی فوجی صلاحیت کو کمزور کرنے کی ایک بڑی حکمت عملی کا حصہ ہے۔ اس کا مقصد ملک کے اندر میزائل اور ڈرون سے متعلق سامان کی نقل و حرکت کو روکنا تھا۔

حملے پر ایران کا سخت ردعمل
ایران کے لیڈر نے اس حملے پر سخت ردعمل ظاہر کیا۔ پارلیمنٹ کے اسپیکر محمد قالیباف نے کہا، ’’جب ملک کے دفاع کی بات آئے گی تو ہم میں سے ہر شخص سپاہی بن جائے گا۔‘‘ انہوں نے کہا کہ ایرانی عوام تیار ہیں اور ڈٹے ہوئے ہیں۔ تہران نے فی الحال امریکہ کے ساتھ مذاکرات سے انکار کر دیا ہے۔ وزارت خارجہ کے ترجمان نے کہا کہ موجودہ حالات میں بات چیت ممکن نہیں ہے۔

دیگر مقامات پر بھی حملے
اس حملے کے ساتھ دیگر علاقوں میں بھی کارروائیاں کی گئیں۔ ایرانی حکام کے مطابق ایک فضائی حملے میں پاشچر انسٹی ٹیوٹ آف ایران کو نشانہ بنایا گیا، جو ایک بڑا عوامی صحت مرکز ہے۔ وزارت صحت کے ترجمان نے اسے ’بین الاقوامی صحت کے تحفظ پر براہ راست حملہ‘ قرار دیا۔

خطے میں کشیدگی میں اضافہ
یہ تنازع اب پورے خطے میں پھیلتا نظر آ رہا ہے۔ اسرائیل نے کہا کہ اس نے ایران سے داغی گئی میزائلوں کو روک دیا۔ دوسری جانب یمن کے حوثی باغیوں نے بھی اسرائیل کی طرف میزائل داغے۔

سفارتی سطح پر بھی تعطل
سفارتی سطح پر بھی کوئی پیش رفت نظر نہیں آ رہی۔ روس، چین اور فرانس نے اقوام متحدہ کی سلامتی کونسل میں آبنائے ہرمز کو کھولنے کے لیے طاقت کے استعمال کی اجازت دینے کی تجویز کو روک دیا۔

بھارت ایکسپریس۔